នាព្រឺកថ្ងៃអង្គារ ៦កើត ខែកត្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៣ ខែវិច្ឆិកា ឆ្នាំ២០១៨នេះ លោកឧត្តមសេនីយ៍ត្រី បែន តារា ស្នងការនគរបាលខេត្តកែប បានចុះជួបអាជីវករនៅផ្សារក្តាមដើម្បីត្រួតពិនិត្យ និងផ្សព្វផ្សាយណែនាំដល់អាជីវករតំបន់ទេសចរណ៍នេះ រាល់ការលក់ដូរ និងផលិតផលមិនត្រូវឱ្យមានការបន្លំទៅលើអ្នកទិញ ក៏ដូចជាភ្ញៀវទេសចរណ៍នោះទេ ជាពិសេសគឺការបន្លំភ្នែកជញ្ជីង ដែលអ្នកលក់ត្រូវដាក់តាំងបង្ហាញតម្លៃ នៃផលិតផល និងសេវាកម្មរបស់ខ្លួន។ បន្ថែមពីនេះលោកស្នងការ ក៏មានវិធានការអប់រំលើកទី1-2 បើនៅតែប្រព្រឹត្តិមិនគោរពតាមទៀតនោះ អាជ្ញាធរសំរេចសុំគោលការណ៍ពីថ្នាក់លើដើម្បីបិទរបរអាជីវកម្មនេះទាំងស្រុងតែម្តង។ ប្រតិបត្តិការនេះធ្វើឡើងបន្ទាប់ពីមានការប្តឹងតវ៉ាពីសំណាក់ភ្ញៀវទេសចរណ៍ជាតិ អន្តរជាតិ អំពីបញ្ហាការប្រកបអាជីកម្មលក់ដូររបស់អាជីវករនៅផ្សារក្តាម ដោយការលក់ និងថ្លឹងមានភាពមិនប្រក្រតី។ ដោយឡែកលោកឧត្តមសេនីយ៍ ស្នងការនគរបាលខេត្ត ក៏បានណែនាំដល់កំលាំងនគរបាលប៉ុស្តិ៍ប្រចាំការនៅតំបន់ឆ្នេរនិងផ្សារក្តាម ត្រូវបន្តពង្រឹងការគ្របគ្រងសន្តិសុខ សុវត្ថិភាពនៅគ្រប់គោលដៅ និងជម្រុញឲ្យមានការបង្កើតបណ្តាញសន្តិសុខស្ម័គ្រចិត្ត នៅតាមមូលដ្ឋានតាមរយះការចូលរួមពីប្រជាពលរដ្ឋ ប្រតិបត្តិករទេសចរណ៍ និងអាជីវករផងដែរ ដើម្បីឱ្យមានសន្តិសុខ សុវត្ថិភាពល្អ ជាការទាក់ទាញភ្ញៀវទេសចរណ៍អោយមកសំរាកកំសាន្តកាន់ច្រើនឡើងបន្តទៀត៕អែមមី
ប្រភពៈ ស្នងការនគរបាលខេត្តកែប