ក្រសួងទេសចរណ៍សហការជាមួយរដ្ឋបាលខេត្តព្រះសីហនុ ធ្វើពិធីផ្សព្វផ្សាយក្រកាសស្តីពីការ បង្កើតក្រុមការងារជំនាញ ដើម្បីពង្រឹងការគ្រប់គ្រង និងអភិវឌ្ឍទេសចរណ៍ខេត្តព្រះសីហនុ ដែលរៀបចំឡើងកាលពីថ្ងៃចន្ទ ០៥កើត ខែកត្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១២ ខែវិច្ឆិកា ឆ្នាំ២០១៨ម្សិលមិញនេះ ក្រោមអធិបតីភាពឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ នៅសណ្ឋាគារឯករាជ្យ ស្ថិតនៅសង្កាត់លេខ៣ ក្រុងព្រះសីហនុ។
ថ្លែងក្នុងឱកាសនេះឯកឧត្តម យន្ត មីន អភិបាល នៃគណអភិបាលខេត្តព្រះ សីហនុ មានប្រសាសន៍ថា ការអភិវឌ្ឍខេត្តព្រះសីហនុ ក្នុងរយៈពេលប៉ុន្មានឆ្នាំចុងក្រោយនេះ មានចាប់អារម្មណ៍ពីគ្រប់មជ្ឈដ្ឋានទាំងក្នុងស្រុក និងក្រៅស្រុកពិសេសការអភិវឌ្ឍន៍វិស័យឧស្សាហកម្ម និងទេសចរណ៍។ ដោយឡែកវិស័យទេសចរណ៍ដើរតួនាទីយ៉ាងសំខាន់ ជាមធ្យមមានភ្ញៀវទេសចរមកសម្រាក់ និងលំហែកម្សាន្តមានប្រមាណជាង ២លាននាក់ ក្នុងមួយឆ្នាំ មានការកើនឡើងពី ១៥ ទៅ ២០ភាគរយ។ ឯកឧត្តម យន្ត មីន បញ្ជាក់ថា ក្នុងឆ្នាំ២០១៨- ២០១៩ ខេត្តព្រះសីហនុ សណ្ឋាគារកម្រិតផ្កាយ ៣ ដល់ផ្កាយ៥ បាននឹងកំពុងដំណើរការបន្ថែមប្រហែលចំនួន ១០ទីតាំង មានបន្ទប់ស្នាក់នៅប្រមាណ ២.០០០បន្ទប់សំរាប់ជួយដោះស្រាយតម្រូវការស្នាក់នៅរបស់ភ្ញៀវទេសចរណ៍។ ឯកឧត្តមបន្តថា ខេត្តព្រះសីហនុ ជាប៉ូលសេដ្ឋកិច្ច មានតំបន់ ឧស្សាហកម្ម ពាណិជ្ជកម្ម ទេសចរណ៍ និងជាបំពង់កសេដ្ឋកិច្ចរបស់កម្ពុជា ដែលរាជរដ្ឋាភិបាលចាត់ទុកខេត្តព្រះសីហនុ ជាតំបន់សេដ្ឋកិច្ចគំរូពហុបំណងធំជាងគេតែមួយគត់របស់កម្ពុជា។ ប៉ុន្មានឆ្នាំចុងក្រោយនេះ ខេត្តព្រះសីហនុបានប្រែក្លាយមុខមាត់យ៉ាងខ្លាំងដែលធ្វើឲ្យមានការចាប់អារម្មណ៍ពីគ្រប់មជ្ឈដ្ឋានទាំងក្នុងស្រុក និងក្រៅស្រុក ជាពិសេសលើការអភិវឌ្ឍ វិស័យឧស្សា ហកម្ម និងទេសចរណ៍ ជាមួយនឹងការអភិវឌ្ឍរីកចម្រើននេះខេត្តព្រះសីហនុ ក៏បានជួបបញ្ហាលំបាកមួយចំនួនផងដែរដែលទាមទារឲ្យវិស័យរដ្ឋនិងឯកជន ព្រមទាំងគ្រប់ភាគីពាក់ព័ន្ធទាំង អស់ចូលរួមសហការអភិវឌ្ឍ ប្រែក្លាយខេត្តព្រះសីហនុ ឱ្យមានការរីកចម្រើនប្រកបដោយចីរភាព៕ រតនា
ប្រភព៖ រដ្ឋបាលខេត្តព្រះសីហនុ