រសៀលថ្ងៃសុក្រ ទី៥ ខែមករា ឆ្នាំ២០២៤ នៅគល់ស្ពានទេត្រើយខាងត្បូង ស្ថិតក្នុងភូមិតាលុស ឃុំបុសលាវ ស្រុកចិត្របុរី ខេត្តក្រចេះ ឯកឧត្តម វ៉ា ថន អភិបាលខេត្តក្រចេះ និងឯកឧត្តម ជា ធារិទ្ធ ជំនួយការសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត អញ្ជើញជាអធិបតីក្នុងពិធីក្រុងពាលីបួងសួងសុំម្ចាស់ទឹកម្ចាស់ដី មុននឹងសម្ពោធឆ្លងបុស្បុកតម្កល់រូបសំណាក ព្រះគ្រូធម្មាចារ្យ គឹម ច្រែង និង សម្តេចអគ្គមហាសេនាបតីតេជោ ហ៊ុន សែន កាលនៅកុមារ និងពិធីពុទ្ធាភិសេកព្រះពុទ្ធប្បដិមាថ្មីនៅក្នុងសាលាឆទាន ដែលត្រូវសម្ពោធបើកជាផ្លូវការនៅថ្ងៃទី៨ ខែមករា ឆ្នាំ២០២៤ ក្រោមអធិបតីភាព ឯកឧត្តម ហ៊ុន ម៉ានី តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាថ្ងៃទី៨ ខែមករា ឆ្នាំ២០២៤ខាងមុខនេះ។
គោលបំណងនៃការកសាងនូវរូបសំណាកព្រះគ្រូធម្មាចារ្យ គឹម ច្រែង និងសម្ដេចអគ្គមហាសេនាបតីតេជោ ហ៊ុន សែន នេះឡើងគឺជាការរំលឹកគុណូបការ:របស់ព្រះគ្រូធម្មាចារ្យ គឹម ច្រែង ជាគ្រូ ដែរបានផ្តល់ការអប់រំទូន្មានប្រៀនប្រដៅ ព្រមទាំងបានផ្តល់នូវការផ្គត់ផ្គង់ស្នាក់អាស្រ័យ នៅពេលសម្តេចកំពុងសិក្សារៀនសូត្រ បានកែប្រែអនាគតពីក្មេងវត្តកូនអ្នកកសិករ មកក្លាយជាបញ្ញាវ័នដ៏ឈ្លាសវៃ ដឹកនាំស្រោចស្រង់ប្រទេសជាតិ និងប្រជាជាតិឲ្យរួចផុតជីវិតពីរណ្តៅមរណ: ប្រល័យពូជសាសន៍ រហូតមកបច្ចុប្បន្ន មានសុខសន្តិភាព ស្ថិរភាព និងការអភិវឌ្ឍន៍រីកចម្រើនលើគ្រប់វិស័យ ។
រូបសំណាក ព្រះគ្រូធម្មាចារ្យ គឹម ច្រែង និង សម្តេចអគ្គមហាសេនាបតីតេជោ ហ៊ុន សែន កាលនៅកុមារ សាងសង់ឡើងអំពីស្ពាន់ ទំហំសាច់ខាងក្នុងប្រវែង៣,៦ម៉ែត្រ x ៣,៦ម៉ែត្រ កំពស់ប្រវែង ២៤,៣ម៉ែត្រ រូបសំណាកព្រះគ្រូធម្មាចារ្យ គឹម ច្រែង កំពស់ ២,៧ម៉ែត្រ រូបសំណាកសម្តេចអគ្គមហាសេនាបតីតេជោ ហ៊ុន សែន កំពស់ ១,៦៨ម៉ែត ។
ឯកឧត្តម វ៉ា ថន អភិបាលខេត្ត បានបញ្ជាក់ថា ក្រោយពីថ្ងៃសម្ពោធដាក់ឲ្យប្រើប្រាស់ជាផ្លូវការ នូវបុស្បុករូបសំណាកនេះរួម ទីតាំងនេះនឹងក្លាយទៅជាទីតាំងទេសចរណ៍កម្សាន្តទស្សនា លម្ហែ នៅពេលធ្វើដំណើរឆ្លងកាត់ និងសម្រាប់បងប្អូនប្រជាពលរដ្ឋរស់នៅនិងតំបន់នេះផងដែរ ដោយទីនេះមានតុបតែងភ្លើងពណ៌ រៀបចំខឿន សួនច្បារ និងដាំដើមឈើលម្អជាម្លប់ និងជារមណីយ៍ដ្ឋានបែបធម្មជាតិ និងជាទីទាក់ទាញផងដែរ ៕
ប្រភព៖រដ្ឋបាលខេត្តក្រចេះ