ស្វាយរៀង: នារសៀលថ្ងៃព្រហស្បតិ៍ ទី១៤ ខែធ្នូ ឆ្នាំ២០២៣ ឯកឧត្តម ម៉ែន អេង អភិបាលរងខេត្តស្វាយរៀង បានអញ្ជើញជាធិបតីក្នុងកម្មវិធី ផ្សព្វផ្សាយប្រព័ន្ធប្រកាសឱ្យដឹងមុន"១២៩៤ " ដល់ប្រជាពលរដ្ឋស្ថិតនៅក្នុងឃុំកំពង់ត្រាច ស្រុករមាសហែក ខេត្តស្វាយរៀង។ នៅក្នុងកម្មវិធីផ្សព្វផ្សាយនេះផងដែរក៏មានការអញ្ជើញចូលរួមពី លោកមន្ត្រីជំនាញទទួលបន្ទុកការងារគ្រោះមហន្តរាយខេត្ត លោក អភិបាលរងស្រុករមាសហែក លោកមេឃុំកំពង់ត្រាច កងកម្លាំងប្រដាប់អាវុធ និងប្រជាពលរដ្ឋជាច្រើនរូបទៀត។
ឯកឧត្តម ម៉ែន អេង អភិបាលរងខេត្ត មានប្រសាសន៍ដ៏មានអត្ថន័យនៅក្នុងកិច្ចផ្សព្វផ្សាយនេះថា : ការត្រៀមទុកជាមុននៅក្នុងការការពារគ្រោះមហន្តរាយវាជារឿងសំខាន់ និងចាំបាច់សម្រាប់បងប្អូនប្រជាពលរដ្ឋគ្រប់រូបរួមទាំងបងប្អូននៅក្នុងខេត្តក្រៅខេត្តផងដែរ។ នៅពេលណាដែលយើងបានត្រៀមទុកជាមុននូវអ្វីដែលនឹងកើតឡើង នោះប្រាកដណាស់ថា នឹងបានជៀសផុតនូវគ្រោះមហន្តរាយផ្សេងៗបានយ៉ាងល្អដូច្នេះហើយក្រុមការងារបានមកបង្ហាត់បង្ហាយនៅកម្មវិធី ផ្សព្វផ្សាយប្រព័ន្ធប្រកាសឱ្យដឹងមុន"១២៩៤ " នៅពេលនេះ។
ឯកឧត្តម អភិបាលរងខេត្ត មានប្រសាសន៍បន្តថា: ទោះជាស្ថិតនៅក្នុងស្ថានភាពណាក៏ដោយ (ទាំងរដូវប្រាំង រដូវវស្សា) យើងត្រូវការពារខ្លួន និងក្រុមគ្រួសារឱ្យបានល្អប្រសើរនិងទទួលបាននូវសុវត្តិភាពខ្ពស់ក្នុងការគេចចេញពីគ្រោះមហន្តរាយដែលបានកើតឡើងនោះ។ជាពិសេសឱពុកម្តាយ ឬអាណាព្យាបាលគ្រប់រូប ត្រូវយកចិត្តទុកដាក់ឱ្យបានខ្ពស់ និងតាមដានរាល់ព័ត៌មានដែលបានចាក់ផ្សាយតាមទូរទស្សន៍ ឬប្រព័ន្ធផ្សព្វផ្សាយផ្សេងៗ ដែលនិយាយពីគ្រោះមហន្តរាយដែលបានកើតឡើងឬមិនទាន់បានកើតឡើងដែលមានប្រភពច្បាស់លាស់ ដើម្បីងាយស្រួលនៅក្នុងការត្រៀមទុកជាមុន៕
ប្រភព៖ រដ្ឋបាលខេត្តស្វាយរៀង
