នៅព្រឹកថ្ងៃទី១១ ខែធ្នូ ឆ្នាំ២០២៣ រដ្ឋបាលខេត្តាកែវ បានរៀបចំពិធីអបអរសាទរ ទិវាពិភពលោកប្រយុទ្ធនឹងជំងឺអេដស៍ ១ធ្នូ ឆ្នាំ២០២៣ ក្រោមប្រធានបទ «សហគមន៍តែមួយឆ្ពោដឹកនាំបញ្ចប់ជំងឺអេដស៍» ក្រោមអធិបតីភាព ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ និងជាប្រធានគណៈកម្មការអេដស៍ខេត្ត ដែលពិធីនេះ ប្រារព្ធធ្វើឡើងនៅបរិវេណវិទ្យាស្ថានបច្ចេកទេសភូមិភាគតេជោសែនតាកែវ។

ក្នុងពិធីនេះ ក៏មានការអញ្ជើញចូលរួមដោយ ឯកឧត្តម លោកជំទាវ លោក លោកស្រី សមាជិក សមាជិក សាខាកាកបាទក្រហមកម្ពុជាខេត្ត ព្រមទាំង លោក នាយក នាយករង វិទ្យាស្ថាន បុគ្គលិក សិស្សនិស្សិត ព្រមទាំង បងប្អូនប្រជាពលរដ្ឋ មានផ្ទុកមេរោគអេដស៍ ជាច្រើនកុះករផងដែរ។

ឆ្លៀតក្នុងឱកាសនោះ ឯកឧត្តម អ៊ូច ភា ក៏បានអានសារលិខិតរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា ក្នុងឱកាសទិវាពិភពលោកប្រយុទ្ធនឹងជំងឺអេដស៍ ១ ធ្នូ ឆ្នាំ២០២៣ ក្រោមប្រធានបទ «សហគមន៍តែមួយដឹកនាំឆ្ពោះទៅបញ្ចប់ជំងឺអេដស៍» ជូនអង្គពិធីទាំងមូលបានស្ដាប់ផងដែរ។

បន្ទាប់ពីបានសារលិខិតរួចមក ឯកឧត្តម អ៊ូច ភា ក៏បានលើកឡើងថា  ដើម្បីអាចបញ្ចប់ជំងឺអេដស៍បាន គឺទាមទារឱ្យមានការចូលរួម ឱ្យបានពេញលេញ និងប្រកបដោយការយកចិត្តទុកដាក់ខ្ពស់ពីគ្រប់ភាគីពាក់ព័ន្ធទាំងអស់ ដូចដែលកម្ពុជា ធ្លាប់បាននិងកំពុងបន្តអនុវត្ត ក្នុងការឆ្លើយតបទូលំទូលាយ និងពហុវិស័យ ទៅនឹងមេរោគអេដស៍/ជំងឺអេដស៍ ដោយមិនទុកនរណាម្នាក់នៅឯកោឡើយ និងការបង្កើតឱ្យមានមធ្យោបាយអប់រំផ្សព្វផ្សាយថ្មីៗ ដែលមានលក្ខណៈឌីជីថល៕

ប្រភព ៖ រដ្ឋបាលខេត្តតាកែវ