នាព្រឹកថ្ងៃអង្គារ ទី២១ ខែវិច្ឆិកា ឆ្នាំ២០២៣នេះ ឯកឧត្ដម ប៉េង ពោធិ៍សា អភិបាលនៃគណៈអភិបាល ខេត្តស្វាយរៀង បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារប្រចាំខែវិច្ឆិកា និងលើក ទិសដៅការងារខែធ្នូ ឆ្នាំ២០២៣ របស់រដ្ឋបាលខេត្ត ។
អញ្ជើញចូលរួមក្នុងកិច្ចប្រជុំនេះមាន ឯកឧត្ដម លោកជំទាវ អភិបាលរងខេត្ត ឯកឧត្តមប្រធានសាលា ដំបូងខេត្ត ឯកឧត្តមព្រះរាជអាជ្ញាអមសាលាដំបូងខេត្ត ឯកឧត្ដមសាកលវិទ្យាធិការសាកល វិទ្យាល័យ ស្វាយរៀង លោកនាយករដ្ឋបាលសាលាខេត្ត លោកមេធាវីប្រចាំរដ្ឋបាលខេត្ត លោកមេបញ្ជាការតំបន់ ប្រតិបត្តិការសឹករងស្វាយរៀង លោកស្នងការរងនគរបាលខេត្ត លោកមេបញ្ជាការរងកងរាជ អាវុធហត្ថ ខេត្ត លោក លោកស្រីប្រធានមន្ទីរ-អង្គភាពនានាជុំវិញខេត្ត លោកអភិបាលក្រុង ស្រុក តំណាង ស្នាក់ ការស៊ើបការណ៍ប្រចាំខេត្តស្វាយរៀង នៃការិយាល័យទី២ បញ្ជាការដ្ឋានកងទ័ពជើងគោក លោក តំណាងទីស្នាក់ការត្រួតពិនិត្យច្រកទ្វារព្រំដែនអន្តរជាតិបាវិត លោក លោកស្រី នាយកទីចាត់ការ /ប្រធានអង្គភាពចំណុះសាលាខេត្ត និងមន្ត្រីពាក់ព័ន្ធមួយចំនួនទៀត ។
មានប្រសាសន៍បើកកិច្ចប្រជុំនាឱកាសនោះ ឯកឧត្ដមអភិបាលខេត្ត បានថ្លែងអំណរគុណ និងកោត សរសើរចំពោះឯកឧត្ដម លោកជំទាវ លោក លោកស្រីជាថ្នាក់ដឹកនាំ កងកម្លាំងប្រដាប់អាវុធ មន្ត្រីរាជការ ក្រុមគ្រូពេទ្យ យុវជនសសយក និងមន្ត្រីពាក់ព័ន្ធទាំងអស់ ដែលបានសហការអនុវត្តតួនាទីភារកិច្ចរបស់ខ្លួនក្នុងការរក្សាការពារសន្តិសុខសុវត្ថិភាពសណ្ដាប់ធ្នាប់សាធារណក្នុងខេត្តជាពិសេសក្នុងឱកាសប្ររព្ធពិធីប្រណាំងទូកកាលពីថ្ងៃទី១៨-១៩ខែវិច្ឆិកា ឆ្នាំ២០២៣នេះ បានល្អប្រសើរ ព្រមទាំងបានចូលរួមសកម្មភាពនានាជាមួយរដ្ឋបាលខេត្ត ទាំងការងារសង្គម និងការងារមនុស្សធម៌ ការឧបត្ថម្ភគាំទ្រជួយដល់ប្រជាពលរដ្ឋ ដែលរងផលប៉ះពាល់ដោយកត្តាផ្សេងៗជាដើម។
ឯកឧត្តមអភិបាលខេត្ត ក៏បានផ្តាំផ្ញើដល់អាជ្ញាធរពាក់ព័ន្ធនូវចំណុចសំខាន់ៗមួយចំនួនដូចខាងក្រោម ៖
១.ត្រូវបន្តយកចិត្តទុកដាក់ថែរក្សាសន្តិសុខ សណ្តាប់ធ្នាប់សង្គមនៅក្នុងខេត្តឲ្យបានល្អប្រសើរជូនប្រជូនប្រជាពលរដ្ឋ ។
២.មន្ទីរកសិកម្ម រុក្ខាប្រមាញ់ និងនេសាទ ក៏ដូចជារដ្ឋបាលក្រុង ស្រុក ត្រូវបន្តតាមដានការ ជំរុញ និងគាំទ្រការប្រមូលផលរបស់បងប្អូនប្រជាកសិករ ឲ្យបានទាន់ពេល ចៀសវាងការខូចខាតដោយប្រការណាមួយ ព្រមទាំងត្រូវមានវិធានការទប់ស្កាត់នូវការប្រមូលទិញផ្តាច់មុខកសិផល របស់ប្រជាពលរដ្ឋពីសំណាក់ឈ្មួញកណ្ដាល ក្នុងការបន្ទាបថ្លៃ ដែលធ្វើឲ្យប៉ះពាល់ដល់ជីវភាពរស់នៅរបស់ប្រជាពលរដ្ឋ ។
៣.មន្ទីរ-អង្គភាព កងកម្លាំងមានសមត្ថកិច្ចពាក់ព័ន្ធ និងអាជ្ញាធរក្រុង-ស្រុក ត្រូវសហការពង្រឹងការគ្រប់គ្រង និងការប្រមូលពន្ធដារ ពន្ធគយ និងពន្ធផ្សេងៗឲ្យបានត្រឹមត្រូវនិងគ្រប់តាមផែនការ ។
៤- មន្ទីរការងារ បណ្ដុះបណ្ដាលវិជ្ជាជីវៈ អាជ្ញាធរមូលដ្ឋាន និងសមត្ថកិច្ចពាក់ព័ន្ធ ត្រូវបន្តតាមដាននិងអនុវត្តវិធានការច្បាប់លើជនទាំងឡាយណា ដែលឆបោកលុយពីកម្មកររោងចក្រ ក្នុងលេសឲ្យចូលបម្រើការងារនៅតាមរោងចក្រណាមួយ។
៥-ត្រូវបន្តពង្រឹងការអនុវត្តច្បាប់ចរាចរណ៍ផ្លូវគោក ការបង្ការទប់ស្កាត់ការជួញដូរ និងប្រើប្រាស់គ្រឿងញៀនឲ្យមានប្រសិទ្ធភាព ។
៦-ត្រូវបន្តការងារទប់ស្កាត់ និងបង្ក្រាបករណីលេងល្បែងស៊ីសងខុសច្បាប់ទាំងអស់នៅតាមមូលដ្ឋានឲ្យបានម៉ឺងម៉ាត់បំផុត ជាពិសេសល្បែងភ្នាល់ និងជល់មាន់តាមអនឡាញ ។
៧-រដ្ឋបាលក្រុង ស្រុក ត្រូវខិតខំពង្រឹងការគ្រប់គ្រងថែរក្សាដីរដ្ឋ ព្រមទាំងទប់ស្កាត់ការចូលទន្រ្ទានកាន់កាប់ដីរដ្ឋ ដីព្រៃ ដីចំណីព្រែក បឹង បួរ ជាដើម ។
៨-អាជ្ញាធរក្រុង ស្រុក ក៏ដូចជាសាខាកាកបាទក្រហមកម្ពុជាខេត្ត គួរត្រៀមសម្ភារៈ ដូចជាអាវរងារ និងភួយជាដើម សម្រាប់ផ្ដល់ជូនលោកយាយ លោកតា ចាស់ៗ ដែលមានជីវភាពខ្វះខាតនៅតាមមូលដ្ឋាន ៕
ប្រភព៖ រដ្ឋបាលខេត្តស្វាយរៀង