ខេត្តតាកែវ ៖ ថ្លែងក្នុងឱកាសអញ្ជើញដឹកនាំកិច្ចប្រជុំផែនការស្ដីពីការចាត់តាំងអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៩ រយៈពេល ១ឆ្នាំ នៅព្រឹកថ្ងៃទី១៣ ខែកុម្ភៈ ឆ្នាំ២០២៤ លោក យង់ សុវឌ្ឍនា អភិបាលរងខេត្តតាកែវ និងជាប្រធានលេខាធិកាដ្ឋានត្រួតពិនិត្យគ្រឿងញៀនខេត្ត បានធ្វើការណែនាំ និងរំលឹកដល់ អាជ្ញាធរក្រុងស្រុកទាំង១០ មន្រ្តីជំនាញ ស្ថាប័នពាក់ព័ន្ធ ត្រូវបន្តយកចិត្តទុកដាក់ តាមរយៈការបង្កើនសកម្មភាព ចុះអប់រំផ្សព្វផ្សាយណែនាំពីបញ្ហាគ្រឿងញៀន ដល់ប្រជាពលរដ្ឋ យុវជន សិស្សនិស្សិត អោយបានទូលំទូលាយនឹងខ្លាំងក្លាបន្ថែមទៀត ដើម្បីអោយពួកគាត់យល់កាន់តែច្បាស់ពីផលប៉ះពាល់នៃគ្រឿងញៀន។
លោក អភិបាលរងខេត្ត បានមានប្រសាសន៍បន្តថា តាមរយៈសកម្មភាពផ្សព្វផ្សាយនេះអាជ្ញាធរមូលដ្ឋាន មន្រ្តីជំនាញពាក់ព័ន្ធ ត្រូវចុះត្រួតពិនិត្យជាប្រចាំនៅតាមទីតាំងនានាក្នុងខេត្ត និងធ្វើកិច្ចសន្យាជាមួយម្ចាស់អាជីវកម្មដើម្បីចូលរួមសហការជាមួយសមត្ថកិច្ច ក្នុងការបង្ការ ទប់ស្កាត់ និងបង្រ្កាប បទល្មើសគ្រឿងញៀន និងបទល្មើសផ្សេងៗទៀត សំដៅកាត់បន្ថយនិងលុបបំបាត់រាល់សកម្មភាពលួចលាក់ កែច្នៃសារធាតុគីមីផ្សំ ការចរាចរណ៍ ប្រើប្រាស់ និងជួញដូរគ្រឿងញៀនខុសច្បាប់ នៅតាមមូលដ្ឋាន ពិសេសត្រូវរៀបចំជាពិដានិងពាក្យស្លោក បិទផ្សាយនៅតាមផ្លូវ វត្តអារាម ផ្ទះសំណាក់ ហាងខ៉ារ៉ាអូខេ និងនៅតាមតំបន់រមណីដ្ឋានទេសចរណ៍ផ្សេងៗទៀត ដើម្បីបញ្ញាក់ស្មារតីដល់យុវជន ប្រជាពលរដ្ឋ សិស្សនិស្សិត ចៀសអោយឆ្ងាយពីគ្រឿងញៀន។
លោក យ៉ង់ សុវឌ្ឍនា អភិបាលរងខេត្តតាកែវ បានបញ្ជាក់ថា គ្រឿងញៀនជាបញ្ហាសង្គមមួយដ៏រ៉ាំរៃ និងស្មុគស្មាញដែលបង្ករអោយមានជាអំពើហឹង្សា និងឧក្រឹដ្ឋកម្មផ្សេងៗកើតឡើង ជាច្រើនដល់សង្គមជាតិរួមនិងមនុស្សទូទៅ ហើយរាជរដ្ឋាភិបាលកម្ពុជា នីតិកាលទី៧នេះ ដែលដឹកនាំដោយ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានកំពុងយកចិត្តទុកដាក់ និងដាក់ចេញនូវវិធានការជាច្រើន ក្នុងការប្រយុទ្ធប្រឆាំងគ្រឿងញៀន ដោយសំដៅធ្វើយ៉ាងណាអោយកម្ពុជា ក្លាយជាប្រទេសដែលគ្មានគ្រឿងញៀនតទៅទៀត៕
ប្រភព ៖ រដ្ឋបាលខេត្តតាកែវ