នាថ្ងៃពុធ ១៤ រោច ខែអស្សុជ ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី៧ ខែវិច្ឆិកា ឆ្នាំ២០១៨ លោកឧត្តមសេនីយ៍ត្រី បែន តារា ស្នងការនគរបាលខេត្តកែប ចូលរួមកិច្ចប្រជុំត្រួតពិនិត្យការងារ សហប្រតិបត្តិការ ការពារសន្តិសុខ សណ្តាប់ធ្នាប់ព្រំដែន រវាងមន្ទីរនគរបាលខេត្ត គៀនយ៉ាង(វៀតណាម) ជាមួយស្នងការដ្ឋាននគរបាលខេត្តកែប កំពត ព្រះសីហនុ(កម្ពុជា) រយៈពេលមួយឆ្នាំកន្លងមក នៅមន្ទីរនគរបាលខេត្ត គៀនយ៉ាង។
ក្នុងឱកាសកិច្ចប្រជុំនេះ មានវត្តមានប្រតិភូនគរបាលខេត្តគៀនយ៉ាង វៀតណាម ដឹកនាំដោយលោកស្រី ឧត្តមសេនីយ៍ត្រី ប៊ួយ ទ្វៀតមិញ នាយកមន្ទីរនគរបាលខេត្ត គៀនយ៉ាង និងប្រតិភូចំនួន២៤នាក់។ ប្រតិភូនៃស្នងការដ្ឋាន នគរបាលខេត្តកែប ចំនួន១៥នាក់ ដឹកនាំដោយ លោកឧត្តមសេនីយ៍ត្រី បែន តារា ស្នងការនគរបាលខេត្ត។ ខេត្តកំពត ដឹកនាំដោយ លោកឧត្តមសេនីយ៍ទោម៉ៅ ច័ន្ទមធុរិទ្ទ ស្នងការនគរបាលខេត្ត និងប្រតិភូអមដំណើរចំនួន២១នាក់ និងខេត្តព្រះសីហនុ ដឹកនាំដោយ លោកឧត្តមសេនីយ៍ត្រី ហ៊ុន សុរឹទ្ធី ស្នងការរងនគរបាលខេត្ត និងប្រតិភូអមដំណើរ២១នាក់។
អង្គប្រជុំបានស្តាប់របាយការណ៍ បូកសរុបលទ្ធផល នៃកិច្ចប្រតិបត្តិការ ការពារសន្តិសុខព្រំដែន បង្ការទប់ស្កាត់ បង្ក្រាបបទល្មើសនានា តាមតំបន់ព្រំដែនគោក និងតាមដែនទឹកប្រវត្តិសាស្ត្រ នៃប្រទេសទាំងពីរ រួមមាន: បទល្មើសឆ្លងដែន បទល្មើសនេសាទ ការជួញដូរមនុស្ស ការជួញដូរផ្លូវភេទ ការជួញដូរអាវុធ ការជួញដូរគ្រឿងញៀន បទល្មើសសេដ្ឋកិច្ច បទល្មើសព្រហ្មទណ្ឌ និងបទល្មើសផ្សេងៗទៀត ជាពិសេសអំពើភេរវកម្មនានា ដែលមានបំណងញុះញង់បំបែកបំបាក់ បំផ្លាញសន្តិសុខជាតិ ចំណងមិត្តភាពនៃប្រទេសទាំងពីរ កម្ពុជា~វៀតណាម។
ក្នុងឱកាសនោះដែរ លោកស្រីនាយកមន្ទីរនគរបាលខេត្ត គៀនយ៉ាង វៀតណាម និង លោកស្នងការ នគរបាលទាំងបីខេត្តកម្ពុជា បានឡើងធ្វើបទអន្តរាគមន៍ ជាបន្តបន្ទាប់ ដោយបានឯកភាពលើរបាយការណ៍បូកសរុបលទ្ធផលការងារមួយឆ្នាំកន្លងមក ព្រមទាំងបន្តប្តេជ្ញាចិត្តយ៉ាងមុតមាំ បន្តកិច្ចសហប្រតិបត្តិការ ការពារសន្តិសុខ រក្សាសណ្តាប់ធ្នាប់ព្រំដែន រវាងប្រទេសទាំងពីរ ប្រែក្លាយព្រំដែននៃប្រទេសទាំងពីរ ប្រកបដោយ សុខសន្តិភាព និងការអភិវឌ្ឍន៍។អែមមី
ប្រភពៈស្នងការនគរបាលខេត្តកែប