តាកែវ ៖ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ បានធ្វើការណែនាំបន្ថែមទៀតទៅដល់មន្រ្តីសុខាភិបាលទាំងអស់ ត្រូវតែពង្រឹងឱ្យបានខ្លាំងខ្លានូវចំណេះជំនាញលើសមត្ថភាពរបស់ខ្លួន ពិសេសទាំងលើក្រមសីលធម៌វិជ្ជាជីវៈ បង្កើនភាពអត់ធ្មត់ និងការខិតខំយកចិត្តទុកដាក់ពិនិត្យព្យាបាលជំងឺជូនបងប្អូនប្រជាពលរដ្ឋ។ ថ្លែងក្នុងឱកាសអញ្ជើញជាអធិបតីក្នុងពិធីប្រកាសចូលកាន់មុខតំណែង ប្រធាន អនុប្រធាន មន្ទីរពេទ្យបង្អែកខេត្ត នៃមន្ទីរសុខាភិបាលខេត្តតាកែវ នៅថ្ងៃទី២៦ ខែកញ្ញា ឆ្នាំ២០២៣ ឯកឧត្តម អ៊ូច ភា អភិបាលខេត្តតាកែវ មានប្រសាសន៍បន្តថា ក្នុងសម័យកាលបច្ចុប្បន្ននេះ បច្ចេកវិទ្យាកាន់តែទំនើប និងជឿនលឿន ក្នុងនោះដែរ ក៏ទាមទារឱ្យមន្រ្តីសុខាភិបាលរបស់យើង ត្រូវខិតខំបង្កើនសមត្ថភាពទៅតាមជំនាញរបស់ខ្លួនឱ្យបានខ្លាំងជាងមុន ដើម្បីយើងដើរឱ្យទាន់វិស័យសុខាភិបាលនឹងប្រទេសជិតខាងឬប្រទេសនានាលើសកលលោកព្រោះវិស័យសុខាភិបាលពិតជាសំខាន់ខ្លាំងណាស់ សម្រាប់មនុស្សជាតិរបស់យើង។ ឯកឧត្តម អភិបាលខេត្ត បន្ថែមទៀតថា ការពង្រឹងសមត្ថភាពលើជំនាញវិជ្ជាជីវៈរបស់លោកគ្រូអ្នកគ្រូពេទ្យនេះ វានឹងធ្វើឱ្យវិស័យសុខាភិបាលរបស់យើង កាន់តែមានទំនុកចិត្តមកលើបងប្អូនប្រជាពលរដ្ឋ ពិសេសវាអាចធ្វើឱ្យពលរដ្ឋមួយចំនួនងាកមកទទួលសេវាសុខាភិបាលនៅក្នុងស្រុកវិញ ដូច្នេះហើយ ទន្ទឹមនឹងការពង្រឹងទាំងសមត្ថភាព ក្រមសីលធម៌នេះផងដែរ ក្រុមគ្រូពេទ្យរបស់យើងមួយចំនួនតូចក៏ត្រូវតែកែប្រែឬផ្លាស់ប្តូរឥរិយាបទ សំដីសំដៅមួយចំនួនមិនសមរម្យចេញ ហើយយកចិត្តទុកដាក់ខិតខំបម្រើសេវាសុខាភិបាលនេះជូនបងប្អូនប្រជាពលរដ្ឋរបស់យើងឱ្យបានកាន់តែល្អប្រសើរឡើងថែមទៀត ។ សូមជម្រាបជូនដែរថា លោកវេជ្ជបណ្ឌិតឯកទេស តែ វ៉ាន់ថា ដែលត្រូវបានតែងតាំងជា ប្រធានមន្ទីរពេទ្យបង្អែកខេត្តថ្មី ជំនួស លោកវេជ្ជបណ្ឌិត ឈូវ ឈួន ដែលត្រូវចូលនិវត្តន៍ ហើយក៏សូមអបអរសាទរចំពោះ លោកវេជ្ជបណ្ឌិត ចា សង្ហៈ និងលោកស្រី សុខ តុញ ដែលត្រូវបានតែងតាំងជាអនុប្រធានមន្ទីរពេទ្យបង្អែកខេត្តតាកែវ៕ ប្រភព ៖ រដ្ឋបាលខេតាកែវ