នៅថ្ងៃអង្គារ ទី១៩ ខែកញ្ញា ឆ្នាំ២០២៣ លោកជំទាវ មិថុនា ភូថង អភិបាល នៃគណៈអភិបាលខេត្ត អនុញ្ញាតជូន លោក Dominic Williams ឯកអគ្គរាជទូតអង់គ្លេស ប្រចាំនៅកម្ពុជា ចូលជួបសម្ដែងការគួរសម និងពិភាក្សាការងារ។ នាឱកាសនោះ លោកជំទាវអភិបាលខេត្ត បានលើកឡើងថា តាងនាមឱ្យថ្នាក់ដឹកនាំខេត្ត ជំនួសមុខឱ្យប្រជាជនខេត្តកោះកុងទាំងអស់ សូម ស្វាគមន៍ និងសម្តែងនូវសេចក្ដីរីករាយក្រៃលែង ដោយបាន ឯកឧត្ដម និងសហការី នៃស្ថានទូតអង់គ្លេស ប្រចាំនៅប្រទេសកម្ពុជា បានអញ្ជើញមកទស្សនកិច្ច និងឆ្លៀតពេលវេលាដ៌មមាញឹក និងមានតម្លៃជួបសម្តែងការគួរសមនាពេលនេះ។ លោកជំទាវ មិថុនា ភូថង បានមានប្រសាសន៍ថា ខេត្តកោះកុង គឺជាខេត្តមួយដែលមានស្ថានភាព ភូមិសាស្ត្រល្អ និងទទួលបានក្រុមហ៊ុនខ្នាតអន្តរជាតិចម្រុះជាច្រើន ចូលមកដា់កទុនវិនិយោគ ដោយសារខេត្តនេះសម្បូរទៅដោយធនធានធម្មជាតិ មានសក្តានុពល និងលក្ខណៈអំណោយផលជាច្រើន។ លោកជំទាវអភិបាលខេត្ត មានក្ដីសង្ឃឹម និងជឿជាក់ថា រដ្ឋបាលខេត្ត និងស្ថានទូត នឹងកាន់តែមានទំនាក់ទំនងកិច្ចសហការល្អបន្ថែមទៀត ហើយនិងអាចទទួលបានវត្តមានរបស់វិនិយោគជនជាតិអង់គ្លេស មកដាក់ទុនលើវិស័យជាអាទិភាពណាមួយនៅលើទឹកដីខេត្តកោះកុង៕ ប្រភព៖ រដ្ឋបាលខេត្តកោះកុង