ខេត្តកណ្ដាល ៖ នៅថ្ងៃទី៤ ខែកញ្ញា ឆ្នាំ២០២៣ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល ព្រមទាំងមន្ទីរអង្គភាពពាក់ព័ន្ធ និងអាជ្ញាធរស្រុកមុខកំពូល បានអញ្ជើញសម្របសម្រួលដោះស្រាយបើកផ្លូវមួយកន្លែងជូនព្រះសង្ឃ ពុទ្ធបរិស័ទ និងប្រជាពលរដ្ឋ សម្រាប់មកធ្វើបុណ្យ នៅអាស្រមទួលព្រះធាតុ ក្នុងភូមិព្រែកតាបែន ឃុំព្រែកអញ្ចាញ ស្រុកមុខកំពូល ខេត្តកណ្ដាល។ នាឱកាសនោះ ឯកឧត្តម គង់ សោភ័ណ្ឌ អភិបាលខេត្តកណ្ដាល បានណែនាំដល់ក្រុមការងារ និងអាជ្ញាធរស្រុកមុខកំពូល ត្រូវធ្វើការត្រួសត្រាយបើកផ្លូវ ចាក់ដីលើកឱ្យខ្ពស់ផុតពីទឹក ព្រមទាំងក្រាលគ្រោះ ដើម្បីមានភាពងាយស្រួល ក្នុងការធ្វើដំណើរជាបណ្ដោះអាសន្ន ក្នុងនោះដែរ នៅពេលក្រាលគោះរួច ត្រូវបំពាក់សូឡាអមសងខាងផ្លូវចូល ដើម្បីបំភ្លឺជូនប្រជាពលរដ្ឋផងដែរ។ នៅពេលផ្លូវនេះ មានគ្រឹះមាំរួចហើយ ផ្លូវនេះ ត្រូវធ្វើការចាក់បេតុងឱ្យបានស្អាតជូនប្រជាពលរដ្ឋផងដែរ។ ឯកឧត្តម អភិបាលខេត្ត បានថ្លែងអំណរគុណចំពោះសប្បុរសជន និងម្ចាស់ដី ដែលបានបរិច្ចាគដី សម្រាប់បើកផ្លូវចូលអាស្រមទូលព្រះធាតុ ដែលជាការបរិច្ចាគមួយដ៏ធំធេងជូនដល់ប្រជាពលរដ្ឋ ពុទ្ធបរិស័ទសម្រាប់ធ្វើបុណ្យ នៅវត្តទួលព្រះធាតុនេះ៕ ប្រភព ៖ រដ្ឋបាលខេត្តកណ្ដាល