នៅថ្ងៃចន្ទ ទី២១ ខែសីហា ឆ្នាំ២០២៣ រដ្ឋបាលខេត្តកោះកុង រៀបចំពិធីបើកវគ្គបណ្តុះបណ្តាល ស្តីពីយន្តការដោះស្រាយបណ្តឹងពលករទេសន្តរប្រវេសន៍ ផ្តោតលើវិស័យនេសាទ និងកែច្នៃអាហារសមុទ្រ ក្រោមអធិបតីភាព ឯកឧត្តម ហ៊ូ វុឌ្ឍី រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មការប្រឹក្សាយោបល់ក្នុងការអនុវត្តកម្មវិធីសិទ្ធិពលករនេសាទនៅអាស៊ីអាគ្នេយ៍ អញ្ជើញស្វាគមន៍ពីសំណាក់ លោក ស្រេង ហុង អភិបាលរង នៃគណៈអភិបាលខេត្តកោះកុង។ លោកអភិបាលរងខេត្ត បានមានប្រសាសន៍ថា ក្នុងនាមរដ្ឋបាលខេត្ត និងក្នុងនាមខ្លួនលោកផ្ទាល់ លោកសូមថ្លែងអំណរគុណយ៉ាងជ្រាលជ្រៅចំពោះវត្តមាន ឯកឧត្តម លោក លោកស្រី អ្នកនាងកញ្ញា ដែលអញ្ជើញមកពីក្រសួងការងារ និងបណ្ដុះបណ្ដាលវិជ្ជាជីវៈ លេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត (គ.ខ.ប.ជ.) ស្នងការដ្ឋាននគរបាល មន្ទីរ អង្គភាពជំនាញថ្នាក់ខេត្ត និងក្រុមប្រឹក្សាឃុំសង្កាត់ក្នុងខេត្តកោះកុង រួមមាន៖ សង្កាត់ស្មាច់មានជ័យ សង្កាត់ដងទង់ សង្កាត់ស្ទឹងវែង ឃុំបាក់ខ្លង ឃុំពាមក្រសោប និងឃុំទួលគគីរ ចូលរួមក្នុងវគ្គបណ្ដុះបណ្ដាលដ៏មានសារៈសំខាន់នាពេលនេះ។ លោកអភិបាលរងខេត្ត បានបន្តថ្លែងអំណរគុណដល់អគ្គនាយកដ្ឋានការងារ នៃក្រសួងការងារ និងបណ្តុះបណ្តាលវិជ្ជាជីវៈ អង្គការជំនួយផ្លូវច្បាប់ដល់កុមារ និងស្រ្តី និងអង្គការអន្តរជាតិខាងការងារ ដែលបានសហការរៀបចំឱ្យមានវគ្គបណ្តុះបណ្តាលនាថ្ងៃនេះ។ ខេត្តកោះកុងមានច្រកទ្វារព្រំដែនអន្តរជាតិចាំយាមសម្រាប់ឆ្លងចេញ-ចូលប្រទេសថៃ។ តាមរយៈច្រកអន្តរជាតិនេះ គឺបានសង្កេតឃើញថា មានពលករទេសន្តប្រវេសន៍កម្ពុជាបានឆ្លងចេញចូលទៅធ្វើការនៅប្រទេសថៃ ទាំងស្របច្បាប់ និងពលករមួយចំនួនឆ្លងចូលទៅធ្វើការដោយពុំមានឯកសារគ្រប់គ្រាន់។ លោកអភិបាលរងខេត្ត បានបន្ថែមថា រដ្ឋបាលខេត្តកោះកុង បានស្វាគមន៍ គាំទ្រ និងសហការជាមួយអង្គការជាតិ និងអង្គការអន្តរជាតិក្នុងការអនុវត្តកម្មវិធី និងសកម្មភាពនានាទាក់ទងនឹងទេសន្តរប្រវេសន៍ការងារ ដែលក្នុងនោះការលើកកម្ពស់ការយល់ដឹងអំពីបទដ្ឋានគតិយុត្តិពាក់ព័ន្ធ ការធ្វើទេសន្តរប្រវេសន៍ការងារដោយសុវត្ថិភាព និងការធ្វើសមាហរណកម្ម ពិសេសការផ្សព្វផ្សាយអំពីពត៌មានទីផ្សាការងារក្នុងស្រុកដល់ពលករ ដែលបានវិលត្រឡប់មកវិញ។ លោកអភិបាលរងខេត្ត បានបន្តថា ក្នុងនាមគណៈអភិបាលខេត្ត លោកសូមសម្ដែងនូវការប្ដេជ្ញាចិត្តក្នុងការដឹកនាំ និងសម្របសម្រួលការអនុវត្តសកម្មភាពនៅថ្នាក់ខេត្តក្នុងការការពារ និងលើកកម្ពស់សិទ្ធិ និងអត្ថប្រយោជន៍ផ្សេងៗរបស់ពលករឱ្យកាន់តែទទួលបានជោគជ័យបន្ថែមទៀត ជាពិសេស ក្នុងការលើកទឹកចិត្តដល់ប្រជាពលរដ្ឋឱ្យស្វែងរកការងារធ្វើនៅក្នុងស្រុកដែលប្រទេសកម្ពុជាបាននឹងកំពុងអភិវឌ្ឍន៍ជាបន្តបន្ទាប់ តែបើទៅធ្វើការនៅបរទេស ត្រូវតែទៅធ្វើការតាមរយៈប្រព័ន្ធស្របច្បាប់ ដែលហៅថា (តាមប្រព័ន្ធ MOU) ៕ ប្រភព៖ រដ្ឋបាលខេត្តកោះកុង