នៅព្រឹកថ្ងៃទី៩ ខែសីហា ឆ្នាំ២០២៣ លោក អម សុភា អភិបាលរង នៃគណៈអភិបាលខេត្តកំពង់ឆ្នាំង បានអញ្ជើញដឹកនាំកិច្ចប្រជុំត្រៀមរៀបចំពិធីបុណ្យអុំទូក អកអំបុក បណ្តែតប្រទីប និងសំពះព្រះខែឆ្នាំ២០២៣ ដោយមានការអញ្ជើញចូលរួមពីសំណាក់ លោក លោកស្រី អភិបាលរងក្រុង-ស្រុក ទាំង៨ ក្នុងខេត្តផងដែរ។ នាឱកាសនោះ លោក អម សុភា បានមានប្រសាសន៍ថា ប៉ុន្មានឆ្នាំមកនេះ ដោយសារការរីករាលដាលនៃជំងឺកូវីដ១៩ រាជរដ្ឋាភិបាលបានផ្អាកការប្រណាំងទូក នៃពិធីបុណ្យអុំទូក អកអំបុក សំពះព្រះខែ ដែលជាបុណ្យប្រពៃណីខ្មែរយើង។ ប៉ុន្តែឆ្នាំ២០២៣នេះ រាជរដ្ឋាភិបាលបានអនុញ្ញាត្តអោយមានពិធីប្រណាំងទូកឡើងវិញ។ លោកអភិបាលរងខេត្ត បានមានប្រសាសន៍ជម្រុញដល់អាជ្ញាធរក្រុង-ស្រុក ដែលមានទូកង ទូកមួង ផ្នែកបុរស នារី ត្រូវត្រៀមលក្ខណ: នៃការរៀបចំកែលម្អទូកអោយស្អាត និងរឹងមាំឡើងវិញដើម្បីត្រៀមក្នុងការចូលរួមក្នុងពិធីប្រណាំងទូកនាពេលខាងមុខក្នុងការដណ្តើមជ័យលាភីជូនខេត្ត៕ ប្រភព៖ រដ្ឋបាលខេត្តកំពង់ឆ្នាំង