ខេត្តកណ្តាល ៖ នៅថ្ងៃទី២៤ ខែកក្កដា ឆ្នាំ២០២៣ ឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានអញ្ជើញនាំយកនូវទេយ្យទាន បច្ច័យ និងទៀនចំណាំព្រះវស្សា ប្រគេនដល់ព្រះសង្ឃ គង់ចាំព្រះវស្សាវចំនួន ២៩វត្ត នៅទូទាំងស្រុកខ្សាច់កណ្ដាល ដោយមានការចូលរួមពី មន្ទីរអង្គភាពជុំវិញខេត្ត មន្ត្រីរាជការ និងអាជ្ញាធរស្រុកខ្សាច់កណ្ដាល។

អញ្ជើញមានប្រសាសន៍ ទៅកាន់ពុទ្ធបរិស័ទ ព្រះសង្ឃ, ឯកឧត្ដម គង់ សោភ័ណ្ឌ អភិបាលខេត្តកណ្ដាល បានលើកឡើងថា ព្រះពុទ្ធសាសនា គឺជាសាសនារបស់រដ្ឋ ដែលយើងទាំងអស់គ្នាមានជំនឿ និងគោរពប្រតិបត្តិតាម ព្រោះថា ព្រះពុទ្ធសាសនា បានផ្តល់ការអប់រំផ្លូវចិត្ត ឱ្យប្រព្រឹត្តនូវអំពើល្អ និងចេះជួយយកអាសាគ្នា សាមគ្គីភាពគ្នា រស់នៅក្នុងសង្គមមួយដោយសុខដុមរមនា។

ឯកឧត្តម អភិបាលខេត្ត បន្តថា ជារៀងរាល់ឆ្នាំ មិនថាពុទ្ធបរិស័ទ ឬសប្បុរសជននោះឡើយ សូម្បីតែអាជ្ញាធរខេត្ត ក៏តែងតែនាំយកនូវទៀនចំណាំព្រះវស្សាមកវេរប្រគេនដល់ព្រះសង្ឃ ដែលគង់ចាំព្រះវស្សា នៅតាមទីវត្តអារាមនានាទូទាំងខេត្តកណ្តាល ដែលនេះជាការបង្ហាញនូវការយកចិត្តទុកដាក់គាំទ្រ ផ្នែកវិស័យពុទ្ធសាសនា ដែលជាសាសនារបស់រដ្ឋផងដែរ។

សូមបញ្ជាក់ថា ទេយ្យទានដែលបានប្រគេនជូនទាំង ២៩វត្ត ដោយវត្តព្រះអនុគុណស្រុក ទទួលបានទៀនព្រះវស្សា ១គូ, អង្ករ ៣០០គីឡូក្រាម, ទឹកសុទ្ធ ៥កេស, ទឹកក្រូច ៥កេស, មី ១០កេសតូច, ត្រីខ ១០យួរ, ស្លាដក់ ១ និងបច្ច័យមួយចំនួន។ ចំពោះវត្តមួយចំនួនទៀត ទទួលបានទៀនព្រះវស្សា ១ គូ, អង្ករ២០០គីឡូក្រាម, ទឹកសុទ្ធ ៥កេស, ទឹកក្រូច ៥កេស, មី ៥កេសតូច, ត្រីខ ១០យួរ, ស្លាដក់ ១ និងបច្ច័យមួយចំនួន៕

ប្រភព ៖ រដ្ឋបាលខេត្តកណ្ដាល