ខេត្តកណ្ដាល ៖ នៅថ្ងៃទី១ ខែឧសភា ឆ្នាំ២០២៣នេះ រដ្ឋបាលខេត្តកណ្ដាល បានប្រារព្ធពិធីអបអរសាទរខួបលើកទី៧៤ នៃទិវាកុមារអន្តរជាតិ ១មិថុនា ក្រោមប្រធានបទ «កុមាររស់ក្នុងសន្តិភាព» ក្រោមអធិបតីភាព លោកជំទាវ ហ៊ុន កុសនី អភិបាលរងខេត្តកណ្ដាល ដែលពិធីនេះធ្វើឡើងនៅមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្ដាល។
នាឱកាសនោះ លោកជំទាវ ហ៊ុន កុសនី អភិបាលរងខេត្តកណ្ដាល បានបញ្ជាក់ថា បច្ចុប្បន្ននេះរាជរដ្ឋាភិបាលកម្ពុជា បាននិងកំពុងតែយកចិត្តទុកដាក់យ៉ាងខ្លាំងចំពោះបញ្ហាគ្រឿងញៀន បញ្ហាការជួញដូរមនុស្ស និងកេងប្រវ័ញ្ច ទាំងពលកម្ម ទាំងផ្លូវភេទ ចំពោះស្ត្រី និងកុមារ ដោយជំរុញឱ្យមានការចុះកិច្ចព្រមព្រៀងអនុស្សារណៈយោគយល់គ្នារវាងបណ្តាប្រទេសក្នុងតំបន់ និងពិភពលោក ដែលមានទំនាក់ទំនងទៅនឹងការជួញដូរមនុស្ស ជាពិសេសកុមារ ហើយក្រសួងមហាផ្ទៃ គឺជាសេនាធិការដឹកនាំ ក្នុងនោះ ក៏មាននាយកដ្ឋានប្រឆាំងការជួញដូរមនុស្ស។
ក្នុងពិធីនេះដែរ លោកជំទាវ ក៏បានផ្ដាំផ្ញើដល់ក្មួយៗសិស្សនុសិស្ស ត្រូវចេះថែទាំ សុខភាព អនាម័យ បរិស្ថាន ទាំងក្នុង និងក្រៅសាលារៀនរបស់ក្មួយៗ ឱ្យបានខ្ជាប់ខ្ជួនជានិច្ច ដើម្បីឱ្យការរស់នៅរបស់យើងប្រកបដោយសុខសុវត្ថិភាព និងមានសុភមង្គល ព្រមទាំងត្រូវខិតខំរៀនសូត្រឱ្យមានចំណេះដឹងប្រកបដោយគុណភាព ដើម្បីរួមចំណែករក្សាកសាង និងជាអ្នកបន្តវេនដ៏មានសក្ដានុពល ជាពិសេសក្មួយៗ ត្រូវចូលរួមគ្រប់សកម្មភាពក្នុងសាលារៀន និងសហគមន៍ ក្នុងការជួយគាំទ្រលើការពង្រឹងគុណភាពអប់រំ ការងារបរិស្ថាន វិន័យសណ្ដាប់ធ្នាប់ និងការពង្រឹងសុវត្ថិភាពចរាចរណ៍ជាដើម។
លោកជំទាវ បានអំពាវនាវចំពោះអាជ្ញាធរគ្រប់ស្ថាប័នពាក់ព័ន្ធទាំងអស់ និងមាតាបិតា អាណាព្យាបាលសិស្ស សូមចូលរួមសហការឱ្យបានល្អប្រសើរជាមួយលោកគ្រូ អ្នកគ្រូ រួមចំណែកថែទាំកុមារ ឱ្យក្លាយជាពលរដ្ឋល្អមានសមត្ថភាព យ៉ាងពេញលេញ ក្នុងការបន្តវេនកសាងមាតុភូមិកម្ពុជាដ៏រុងរឿងរបស់យើង និងសម្រេចឱ្យបាននូវគោលដៅនៃការអប់រំប្រកបដោយបរិយាប័ន្ន ដើម្បីការអប់រំរក្សាបាននូវគុណភាពសម្រាប់កុមារកម្ពុជា៕
ប្រភព ៖ រដ្ឋបាលខេត្តកណ្ដាល
