នៅថ្ងៃចន្ទ ទី១៥ ខែឧសភា ឆ្នាំ២០២៣ រដ្ឋបាលខេត្តកោះកុង បានរៀបចំកិច្ចប្រជុំពាក់ព័ន្ធនឹងការចុះសិក្សា វាយតម្លៃអ្នកស្នើសូមសម្បទានដីសង្គមកិច្ច នៅស្រុកស្រែអំបិល ក្រោមអធិបតីភាព លោក សុខ សុទ្ធី អភិបាលរង នៃគណៈអភិបាលខេត្តកោះកុង ដោយមានការអនុញ្ញាត និងណែនំាពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង។
នាឱកាសនោះ លោក សុខ សុទ្ធី បានពន្យល់ណែនំា ដល់អ្នកពាក់ព័ន្ធ ជាពិសេស មេឃុំ មេភូមិ តំណាងមន្ទីរសង្គមកិច្ច អតីតយុទ្ធជន និងយុវនីតិសម្បទា ឱ្យបានយល់អំពីការចុះសិក្សា វាយតម្លៃ ការសម្ភាសន៍ ការដាក់ពិន្ទុ និងការអង្កេតលើស្ថានភាពទូទៅរបស់ប្រជាពលរដ្ឋ ដើម្បីឱ្យដំណើរការនៃការចុះអនុវត្តការងារនេះ ប្រព្រឹត្តទៅដោយរលូន ត្រឹមត្រូវ យុត្តិធម៌ និងមានតម្លាភាព។
ជាមួយគ្នានេះ លោកអភិបាលរងខេត្ត បានស្នើសូមឱ្យប្រជាពលរដ្ឋកុំមានការជួបជុំប្រមូលផ្តុំគ្នា ព្រោះការចុះសិក្សា វាយតម្លៃនេះ ត្រូវធ្វើឡើងនៅតាមខ្នងផ្ទះ ម្តងមួយខ្នងផ្ទះ ទៅតាមភូមិ-ឃុំនីមួយៗ។
ការចុះសិក្សា វាយតម្លៃ លើគ្រួសារប្រជាពលរដ្ឋដែលស្នើសូមសម្បទានដីសង្គមកិច្ចនេះ នឹងប្រព្រឹត្តទៅចាប់ពីថ្ងៃទី១៦ ខែឧសភា រហូតដល់ថ្ងៃទី៣១ ខែសីហា ឆ្នំា២០២៣ ទៅតាមកម្មវិធីកំណត់ដែលអាជ្ញាធរភូមិ ឃុំ ស្រុក និងខេត្ត បានបិទផ្សាយនៅទីសាធារណៈនៅស្រុកស្រែអំបិល និងផ្សព្វផ្សាយតាមបណ្តាញសង្គមផងដែរ៕
ប្រភព៖ រដ្ឋបាលខេត្តកោះកុង