តាកែវ ៖ បន្ទាប់ពីបញ្ចប់ពិធីបំពាក់គ្រឿងឥស្សរិយយស ជូនអតីតយុទ្ធជនកម្ពុជា ចំនួន ២០០នាក់ នៅតំបន់ប្រតិបត្តិការសឹករងខេត្តតាកែវ នៅថ្ងៃទី១៣ ខែឧសភា ឆ្នាំ២០២៣ រួចមក ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម អគ្គលេខាធិការសមាគមអតីតយុទ្ធជនកម្ពុជា អមដំណើរដោយ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ និងជាប្រធានកិត្តិយសសមាគមអតីតយុទ្ធជនកម្ពុជាខេត្ត, លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្ត, លោក កង អាណាន់ អភិបាលក្រុងដូនកែវ បានអញ្ជើញប្រគល់ផ្ទះមួយខ្នង ដល់អតីតយុទ្ធជន រស់នៅភូមិឡូរី សង្កាត់រកាក្នុង ក្រុងដូនកែវ។

ថ្លែងនៅក្នុងពិធីប្រគល់នាឱកាសនោះ ឯកឧត្តម កិត្តិសង្គហបណ្ឌិត គន់ គីម បានពាំនាំនូវការសាកសួរសុខទុក្ខពី សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រធានសមាគមអតីតយុទ្ធជនកម្ពុជា និងសម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចទាំងទ្វេរ តែងតែយកចិត្តទុកដាក់ដល់អតីតយុទ្ធជនគ្រប់រូប គ្រប់ពេលវេលា ទោះបីស្ថិតក្នុងកាលៈទេសៈណាក៏ដោយ។

ឯកឧត្តម កិត្តិសង្គហបណ្ឌិត បន្ដថា ជាក់ស្តែង កន្លងមក សម្ដេចតេជោ បានផ្ដល់ដីសម្បទាជាច្រើនកន្លែង និងសាងសង់ផ្ទះជូន អតីតយុទ្ធជន ជាច្រើន នេះហើយគឺជាការយកចិត្តទុកដាក់ ចំពោះជីវភាពរស់នៅ និងការឆ្លើយតបចំពោះគុណបំណាច់ យ៉ាងធំធេងរបស់អតីតយុទ្ធជន ក្នុងបុព្វហេតុតស៊ូរំដោះជាតិមាតុភូមិ និងថែរក្សាការពារ សុខសន្តិភាព ជូនប្រទេសជាតិ រហូតមានការអភិវឌ្ឍរីកចម្រើនលើគ្រប់វិស័យ ដូចពេលបច្ចុប្បន្ន៕

ប្រភព ៖ រដ្ឋបាលខេត្តតាកែវ