ព្រឹកថ្ងៃសុក្រ ទី២៨ ខែមេសា ឆ្នាំ២០២៣ ឯកឧត្តម វ៉ា ថន អភិបាលខេត្ត និងលោកជំទាវ ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត អញ្ជើញទទួលស្វាគមន៍ក្បួនដង្ហែព្រះអគ្គិជ័យកីឡា នៃព្រឹត្តការណ៍កីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្លងកាត់ខេត្តក្រចេះ ដឹកនាំដោយ ឯកឧត្តម ហោ សារុន រដ្ឋលេខាធិការក្រសួងទេសចរណ៍ និងជាបេសកជនពិសេស នៃគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ (CAMSOC-CAMAPGOC) ។
ដោយមានការចូលរួមពី ឯកឧត្ដម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត លោក លោកស្រី ប្រធាន អនុប្រធាន មន្ទីរអង្គភាពជាវិញខេត្ត កងកម្លាំងទាំងបីប្រភេទ មន្ត្រីរាជការ យុវជន កីឡាករ កីឡាការិនី និងបងប្អូនប្រជាពលរដ្ឋ យ៉ាងច្រើនកុះករ ។
ឯកឧត្តម វ៉ា ថន អភិបាលខេត្ត មានប្រសាសន៍ថា ខេត្តក្រចេះ មានកិត្តិយស និងជាប្រវត្តិសាស្រ្តដែលបានទទួលដំណើរឆ្លងកាត់ក្បួនដង្ហែព្រះអគ្គិជ័យកីឡា នៃព្រឹត្តការណ៍កីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ នាឱកាសនេះ។
ឯកឧត្តម វ៉ា ថន អភិបាលខេត្ត បានបន្តថា ពិធីដង្ហែព្រះអគ្គិជ័យកីឡា គឺបានបង្ហាញពីភាពរឹងមាំ មោះមុត ការរីកចម្រើន និងការអភិវឌ្ឍលើគ្រប់វិស័យក្នុងប្រទេសកម្ពុជា ក្រោមតំបូលសន្តិភាព ដែលដឹកនាំប្រកបដោយគតិបណ្ឌិត និងឈ្លាសវៃរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។ លើសពីនេះ ព្រះអគ្គិជ័យកីឡាបានដង្ហែគ្រប់បណ្ដាប្រទេសក្នុងតំបន់ គឺបានពង្រឹងសាមគ្គីភាព ចំណងមិត្តភាព ភាពចុះសម្រុងគ្នា និងសុខដមរមនីយកម្មតាមរយៈការប្រកួតកីឡា ដែលជាប្រជាជាតិអាស៊ានតែមួយ មានទស្សនៈតែមួយ អត្តសញ្ញាណតែមួយ សហគមន៍តែមួយរស់នៅក្នុង “សហគមន៍សន្តិភាព និងវាសនាតែមួយ”។
ជាមួយគ្នានេះ ឯកឧត្តម អភិបាលខេត្ត សូមសម្ដែងនូវការគាំទ្រយ៉ាងពេញទំហឹងចំពោះអនុសាសន៍របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ចំពោះការមិនយកថ្លៃសំបុត្រចូលរួមទស្សនារបស់ប្រជាពលរដ្ឋកម្ពុជា និងភ្ញៀវអន្តរជាតិ ការរៀបចំទីកន្លែងស្នាក់នៅ អាហារហូបចុក និងការដឹកជញ្ជូនរបស់ប្រតិភូកីឡា អត្តពលិក គ្រូឧទ្ទេស និងគ្រូបង្វឹកដោយឥតគិតថ្លៃ ដែលបង្ហាញដល់ប្រទេសនានានៅលើសកលលោកពីសណ្ដានចិត្តដ៏ទូលំទូលាយរបស់ប្រជាជនខ្មែរ។ទាំងនេះជាព្រឹត្តការណ៍ដ៏មហាអស្ចារ្យក្នុងប្រវត្តិសាស្រ្តរបស់ព្រះរាជាណាចក្រកម្ពុជា ដែលកើតឡើងក្នុងយុគសម័យតេជោដ៏រុងរឿង និងទន្ទឹងរងចាំជានិច្ចចង់ឱ្យព្រឹត្តការណ៍នេះបានកើតឡើងឆាប់ៗ ដែលនៅសល់តែប្រាំពីរថ្ងៃទៀតតែប៉ុណ្ណោះព្រឹត្តការណ៍នេះនឹងចាប់ផ្ដើមហើយ៕
ប្រភព៖ រដ្ឋបាលខេត្តក្រចេះ