ខេត្តបន្ទាយមានជ័យ ៖ នៅថ្ងៃទី២៦ ខែមេសា ឆ្នាំ២០២៣នេះ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានដឹកនាំកងកម្លាំងអន្តរាគមន៍ ជួយជួសជុលផ្ទះប្រជាពលរដ្ឋរងគ្រោះដោយសារខ្យល់កន្ត្រាក់ នៅក្នុងខេត្តបន្ទាយមានជ័យ។

ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានចូលរួមសោកស្តាយចំពោះបាតុភូតធម្មជាតិ ដែលបង្កគ្រោះថ្នាក់ ក៏ដូចជាបំផ្លិចបំផ្លាញទ្រព្យសម្បត្តិប្រជាពលរដ្ឋ។ ឯកឧត្តម ក៏បានណែនាំដល់ប្រជាពលរដ្ឋត្រូវមានការប្រុងប្រយ័ត្នចំពោះបាតុភូតធម្មជាតិ ពិសេសខ្យល់កន្ត្រាក់ផងដែរ។

ឯកឧត្តម អភិបាលខេត្ត បន្ដថា ក្នុងករណីអាកាសមានការប្រែប្រួល និងចង់ភ្លៀង សូមបងប្អូនប្រជាពលរដ្ឋទៅរកកន្លែងមានសុវត្ថិភាព ចៀសវាងជ្រកក្រោមដើមឈើ ឬខ្សែភ្លើងជាដាច់ខាត។

សូមបញ្ជាក់ថា នាឱកាសនោះ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ក៏បាននាំយកអំណោយជាស័ង្កសី និងឈើ សម្រាប់ជួលជុលផ្ទះប្រជាពលរដ្ឋ ដែលបានរងគ្រោះដោយសារខ្យល់កន្ត្រាក់ ចំនួន ៤១ខ្នងផ្ទះ ស្មើនឹងលើ ៤១គ្រួសារ៕

ប្រភព ៖ រដ្ឋបាលខេត្តបន្ទាយមានជ័យ