អតីតឡូត៍នេសាទលេខ៩ ស្ថិតនៅបឹងក្រពិត ក្នុងឃុំមៀន ស្រុកអូររាំងឪ ដែលមានបទល្មើសនេសាទជាច្រើននោះ ត្រូវបានកម្លាំងសមត្ថកិច្ចចម្រុះក្នុងនោះមាន នគរបាល កងរាជអាវុធហត្ថ ទាហាន រដ្ឋបាលជលផលខេត្ត។ ប្រតិបត្តិការចុះបង្ក្រាបនេះបានធ្វើឡើងនៅ វេលាម៉ោង៨ព្រឹក ថ្ងៃទី៦ កុម្ភៈ ២០១៧ ដោយរឹបអូសបានបទល្មើសនេសាទជាច្រើនប្រភេទរាប់ពាន់ម៉ែត្រ ព្រមទាំងបានចាក់កូនត្រី ចម្រុះ១៣០គីឡូក្រាមចូលទៅក្នុងបឹងធម្មជាតិវិញផងដែរ ។
លោក ងួន ប៊ុណ្ណាន អភិបាលស្រុកអូររាំងឪ ប្រាប់ឲ្យដឹងថា ដោយសារតែមានកម្លាំងល្អបានរាយការន៍ថា នៅបឹងក្រពិតខាងលើ មានបទល្មើសនេសាទជាច្រើនព្រងព្រាត ដើម្បីចាប់យកត្រីធម្មជាតិនោះ ក្រោយពីទទួលបាននូវដំណឹងនេះ រូបលោកបានសុំគោលការណ៍ពីលោក ប្រាជ្ញ ចន្ទ អភិបាលខេត្ត និងលោក ហៀង សុភក្ត្រ ព្រះរាជអាជ្ញាអមសាលាដំបូងខេត្ត ដើម្បីមានវិធានការចុះបង្ក្រាបដោយមិនឲ្យម្ចាស់បទល្មើសនេសាទ ល្មើសច្បាប់ទាំងនោះដឹងនោះទេ។ លោក ងួន ប៊ុណ្ណាន អភិបាលស្រុកអូររាំងឪ ប្រាប់បន្តថា ក្នុងពេលដែលចុះទៅនោះមានការចូលរួមពីកម្លាំងរបស់អាជ្ញាធរស្រុកកោះសូទិនផង គ្រាន់តែឃើញសមត្ថកិច្ចនោះ ម្ចាស់បទល្មើសនេសាទបានសម្ងំស្ងាត់ឲ្យឈឹងមិនឃើញមានអ្នកណាម្នាក់ចេញមុខនោះឡើយ។ សម្រាប់លទ្ធផលដែលបង្ក្រាបបានក្នុងនោះមានដូចជា មាត់លូចំនួន៩៨មាត់ ស្បៃរត់ប្រវែង៤.៩០០ម៉ែត្រ បង្គោលចំនួន១.៧៦៤បង្គោល ព្រមទាំងបានចាក់លែងកូនត្រីចម្រុះជាង១០០គីឡូក្រាម ទៅក្នុងបឹងធម្មជាតិវិញផងដែរ ស្បៃរត់ត្រូវបានកម្លាំងសមត្ថកិច្ចបំផ្លាញចោល ក្នុងទឹកបឹងរួមទាំងបង្គោល។
កន្លងមកនៅពេលណាដែលរូបលោកទទួលបានព័ត៌មានពីបទល្មើសនេសាទនៅបឹងក្រពិត គឺតែងតែបានដឹកនាំកម្លាំងសមត្ថកិច្ចចម្រុះផ្ទាល់ចុះបង្ក្រាបជាច្រើនលើករួចមកហើយ។ លោកអភិបាលស្រុកអូររាំងឪ បញ្ជាក់បន្ថែមថា ជាមួយនោះរូបលោកសូមអំពាវនាវដល់ប្រជាពលរដ្ឋក្នុងមូលដ្ឋានឃុំមៀន ស្រុកអូររាំងឪ សូមប្រើប្រាស់ឧបករណ៍នេសាទណា ដែលច្បាប់ជលផលបានអនុញ្ញាតឲ្យប្រើប្រាស់បានហើយ ។ ហើយឧបករណ៍ខុសច្បាប់សូមឈប់ប្រើប្រាស់ ធ្វើយ៉ាងណាដើម្បីថែរក្សានិរន្តរភាពពពួកមច្ឆជាតិ ឲ្យនៅគង់វង្សបានយូរអង្វែងសម្រាប់ក្មេងៗជំនាន់ក្រោយទទួលទានដោយមិនខ្វះខាតនោះឡើយ៕