ព្រឹកថ្ងៃសុក្រ ទី០៧ ខែមេសា ឆ្នាំ២០២៣ អគ្គនាយកដ្ឋានចំណេះដឹង និងព័ត៌មានបរិស្ថាននៃក្រសួងបរិស្ថាន សហការជាមួយរដ្ឋបាលខេត្តក្រចេះ រៀបចំយុទ្ធនាការ “កាត់បន្ថយការប្រើប្រាស់ថង់ប្លាស្ទិក និងផ្សព្វផ្សាយកន្ត្រកបរិស្ថាន” នៅក្នុងខេត្តក្រចេះ ក្រោមអធិបតីភាពឯកឧត្តម កែន សេរីរដ្ឋា អគ្គនាយកនៃអគ្គនាយកដ្ឋានចំណេះដឹង និងព័ត៌មានបរិស្ថាននៃក្រសួងបរិស្ថាន និងឯកឧត្តម ហង់ ចាន់ឌី អភិបាលរងខេត្ត តំណាងឯកឧត្តម វ៉ា ថន អភិបាលខេត្ត នៅទីតាំងមុខផ្សារសាមគ្គីក្រុងក្រចេះ ដោយមានការចូលរួមពី ឯកឧត្តម ថ្នាក់ដឹកនាំក្រសួងបរិស្ថាន លោក លោកស្រី ប្រធាន អនុប្រធានមន្ទីរអង្គភាពពាក់ព័ន្ធ យុវជន និងសិស្សានុសិស្សសរុបប្រមាណ ៣០០នាក់។
ឯកឧត្តម ហង់ ចាន់ឌី អភិបាលរងខេត្ត បានឲ្យដឹងថា ៖ នាពេលបច្ចុប្បន្ន ប្រទេសនៅលើសកលលោកទាំងមូលកំពុងជួបប្រទះនឹងការប៉ះពាល់យ៉ាងខ្លាំងលើបញ្ហាបរិស្ថាន ជាពិសេសសំណល់ប្លាស្ទិកដែលបានបង្កឱ្យមានគ្រោះថ្នាក់យ៉ាងធ្ងន់ធ្ងរដល់ពិភពលោក សង្គមជាតិ គ្រួសារ និងកូនចៅជំនាន់ក្រោយ ដោយក្នុង១ថ្ងៃ។ជាក់ស្តែងនៅក្នុងខេត្តក្រចេះ ការប្រើប្រាស់សម្ភារៈម្ហូបអាហារ និងផលិតផលផ្សេងៗ បានបន្សល់នូវកាកសំណល់យ៉ាងច្រើនពីមួយថ្ងៃទៅមួយថ្ងៃ និងមានកើនឡើងគួរឱ្យកត់សម្គាល់ ដោយអត្រាកំណើនតម្រូវការរបស់ប្រជាជនកាន់តែច្រើនឡើង ហើយការទុកដាក់ និងវេចខ្ចប់កាក សំណល់សំរាមថង់ប្លាស្ទិកពុំបានត្រឹមត្រូវល្អ សរបុប្រមាណជាង ៣តោន/១ថ្ងៃ ។
ឯកឧត្តមបន្តថា ៖ ស្ថិតក្នុងបញ្ហាប្រឈមខាងលើ ក្នុងនាមថ្នាក់ដឹកនាំខេត្ត បាននឹងកំពុងបន្តធ្វើការផ្សព្វផ្សាយដល់មន្ទីរ-អង្គភាពជុំវិញរដ្ឋបាលខេត្ត រដ្ឋបាលក្រុង ស្រុក ឃុំ សង្កាត់ លោកគ្រូ អ្នកគ្រូ សិស្សានុសិស្ស និងបងប្អូនប្រជាពលរដ្ឋឱ្យចូលរួមខិតខំថែរក្សាអនាម័យ សម្អាតបរិស្ថានជាប្រចាំ និងរក្សាសោភ័ណភាពបរិស្ថានបន្ថែមទៀត តាមរយៈការចូល រួមទាំងអស់គ្នា អនុវត្តយន្តការស្អាតបី គឺស្អាតទឹក ស្អាត និងស្អាតខ្យល់ ។ ជាពិសេសត្រូវខិតខំ សិក្សាស្វែងយល់ពីផលប៉ះពាល់ដែលកើតមកពីថង់ប្លាស្ទិកដែលកំពុងនិយមប្រើប្រាស់ជាប្រចាំ ដោយរួមគ្នាខិតខំដោះស្រាយបញ្ហាសំណល់ប្លាស្ទិក សំដៅធ្វើអោយការប្រើប្រាស់ប្លាស្ទិកត្រូវបានកាត់បន្ថយ មកតិចបំផុតតាមដែលអាចធ្វើបាន ។
ឯកឧត្តម កែន សេរីរដ្ឋាលើកឡើងថាៈ «យុទ្ធនាការដែលបាន រៀបចំក្នុងថ្ងៃនេះ គឺជាការបំផុសស្មារតីរបស់សាធារណជនទូទៅ ឱ្យយល់ដឹងអំពីផល ប៉ះពាល់នៃសំណល់សំរាម ជាពិសេសគឺសំណល់ប្លាស្ទិក ដែលបង្ករគ្រោះថ្នាក់បំផុត ដល់សុខភាពមនុស្ស និងគុណភាពបរិស្ថាន និងជាឱកាសក្នុងការឆ្លុះបញ្ចាំងពីឆន្ទៈរួមគ្នា ដើម្បីកិច្ចគាំពារបរិស្ថាន និងបង្ហាញពីការយកចិត្តទុកដាក់ របស់ប្រជាជនទាំងអស់គ្នា ក៏ដូចជាប្រជាជនលើសកលលោក ដើម្បីបុព្វហេតុរួមចំណែកការពារ និងថែរក្សាគុណ ភាពបរិស្ថាន ភពផែនដីឱ្យឈានឆ្ពោះទៅរក្សានិរន្តរភាព និងភាពស្រស់បំព្រងសម្រាប់ មនុស្សបច្ចុប្បន្ន និងមនុស្សជំនាន់ក្រោយៗ»។
ក្នុងនោះគណៈអធិបតី ក៏បានប្រគល់នូវសៀវភៅកម្ពុជា មាតុភូមិខ្ញុំ ដបទឹកបរិស្ថាន និងកន្រ្ដកបរិស្ថាន ជូនដល់ថ្នាក់ដឹកនាំខេត្ត មន្ទីរអង្គភាពពាក់ព័ន្ធ ចៅសង្កាត់ និងអ្នកចូលរួមក្នុងអង្គពិធី ព្រមទាំងចែកជូនដល់ប្រជាពលរដ្ឋ និងអាជីវករ ក្នុងផ្សារសាមគ្គី ដើម្បីរួមចំណែកកាត់បន្ថយថង់ប្លាស្ទិក ក្នុងជីវភាពប្រចាំថ្ងៃរបស់ពួកគាត់ផងដែរ ៕
ប្រភព៖ រដ្ឋបាលខេត្តក្រចេះ