ខេត្តកណ្តាល ៖ ឯកឧត្តម ណុប ដារ៉ា អភិបាលរងខេត្តកណ្តាល បានអញ្ជើញជាអធិបតីដឹកនាំកិច្ចប្រជុំគណៈបញ្ជាការឯកភាពរដ្ឋបាលស្រុកកោះធំ នៅថ្ងៃទី៧ ខែមីនា ឆ្នាំ២០២៣ នៅសាលាស្រុកកោះធំ ខេត្តកណ្តាល។
មានប្រសាសន៍ក្នុងឱកាសនោះ ឯកឧត្តម ណុប ដារ៉ា បានជំរុញដល់អាជ្ញាធរស្រុក គណៈបញ្ជាការឯកភាពរដ្ឋបាលស្រុក ត្រូវបន្តខិតខំប្រឹងប្រែង សំដៅធ្វើយ៉ាងណាឱ្យស្រុកកោះធំ ប្រែមុខប្រែមាត់ជាបណ្តើរៗ ត្រូវតែបង្ក្រាបទប់ស្កាត់ និងអនុវត្តទៅតាមវិធានការច្បាប់ឱ្យបានម៉ឹងម៉ាត់ ដើម្បីថែរក្សាការពារសុខសុវត្ថិភាពជូនប្រជាពលរដ្ឋ ឱ្យបានល្អប្រសើរ។
ឯកឧត្តម អភិបាលរងខេត្ត ក៏បានផ្តល់នូវអនុសាសន៍មួយចំនួនសម្រាប់យកទៅអនុវត្តនោះ គឺមិនឱ្យមានបទល្មើស ដូចជា អំពើចោរកម្ម គ្រឿងញៀន ល្បែងស៊ីសង ក្មេងទំនើង បន្តអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព គោរពច្បាប់ចរាចរណ៍ ចូលរួមថែរក្សាហេដ្ឋារចនាសម្ព័ន្ធ និងសមិទ្ធផលនានានៅក្នុងមូលដ្ឋាន។
ឯកឧត្តម អភិបាលរងខេត្ត ក៏បានកោតសរសើរដល់គណៈបញ្ជាការឯកភាពស្រុក ដែលបានខិតខំបំពេញការងារ នាពេលកន្លងមក សម្រេចបានលទ្ធផលល្អប្រសើរ ពិសេសការទប់ស្កាត់បានយ៉ាងល្អប្រសើរនូវអំពើឆក់ប្លន់ ការជួញដូរគ្រឿងញៀន និងបទល្មើសនានា ពេលកន្លងមក និងត្រូវបន្ដខិតខំប្រឹងប្រែងបំពេញការងារទាំងអស់នេះ ឱ្យបានកាន់តែល្អថែមទៀត ដោយចូលរួមសហការពីអាជ្ញាធរមូលដ្ឋាន និងប្រជាពលរដ្ឋរាល់បទល្មើសទាំងឡាយ ជាពិសេសបទល្មើសឆ្លងដែនគ្រប់ប្រភេទក្នុងទឹកដីស្រុកកោះធំទាំងមូល និងជំរុញការចុះបញ្ជីដីធ្លីមានលក្ខណៈជាប្រព័ន្ធឱ្យបានឆាប់រហ័ស ដើម្បីកាត់បន្ថយវិវាទផ្សេងៗ ស្របតាមផែនការ រដ្ឋបាលខេត្តតាកែវ៕
ប្រភព ៖ រដ្ឋបាលខេត្តកណ្ដាល