នាព្រឹកថ្ងៃព្រហស្បតិ៍ ០១រោច ខែអស្សុជ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៥ ខែតុលា ឆ្នាំ​២០១៨នេះ នៅសាលប្រជុំសាលាខេត្ត មានរៀបចំកិច្ចប្រជុំបូកសរុបលទ្ធផលការងារប្រចាំខែតុលា និង​លើកទិសដៅការងារខែវិច្ឆិកា ឆ្នាំ២០១៨ របស់រដ្ឋបាលខេត្ត ក្រោមអធិបតីភាពឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង និងមានការអញ្ជើញចូលរួមពី អភិបាលរងខេត្ត លោក លោកស្រី នាយក នាយករងរដ្ឋបាលសាលាខេត្ត សាកលវិទ្យាធិការសាកលវិទ្យាល័យស្វាយរៀង តំណាង​ប្រធានសាលា​ដំបូង​ខេត្ត ព្រះរាជអាជ្ញារង ស្នងការរងនគរបាលខេត្ត មេបញ្ជាការរងតំបន់ប្រតិបត្តិសឹករងស្វាយរៀង មេបញ្ជាការ​រងកងរាជអាវុធហត្ថខេត្ត លោក លោកស្រីប្រធានមន្ទីរ-អង្គភាពនានាជុំវិញខេត្ត អភិបាលក្រុង/ស្រុក និងមន្ត្រីពាក់ព័ន្ធមួយចំនួន។

     មានប្រសាសន៍ក្នុងឱកាសនោះ ឯកឧត្ដមអភិបាលខេត្ត បានថ្លែងអំណរគុណ និងកោតសរសើរចំពោះលោក លោកស្រីថ្នាក់ដឹកនាំ មន្ត្រីរាជការ ក្រុមការងារយុវជន និងកងកម្លាំងប្រដាប់អាវុធក្នុងខេត្តស្វាយរៀងទាំងអស់ ដែលនៅក្នុងខែតុលាកន្លងមកនេះ បានសហការអនុវត្តតួនាទីភារកិច្ចរបស់ខ្លួន រួមចំណែកធ្វើឲ្យខេត្ត រក្សា​បាន​នូវស្ថេរភាពនយោបាយ សន្ដិសុខ សុវត្ថិភាព សណ្ដាប់ធ្នាប់សាធារណៈ និងការផ្ដល់សេវាសា​ធារណៈជូន​ប្រជាពលរដ្ឋបានល្អ។ ជាមួយនេះ ឯកឧត្ដមអភិបាលខេត្ត ក៏បានធ្វើការផ្ដាំផ្ញើដល់មន្ទីរអង្គភាព រដ្ឋបាលក្រុង ស្រុក និងកងកម្លាំងពាក់ព័ន្ធទាំងអស់ ត្រូវបន្តខិតខំអនុវត្តតួនាទីភារកិច្ចរបស់ខ្លួនឲ្យកាន់តែប្រសើរ ដើម្បីចាត់​វិធានការដោះស្រាយ ឲ្យបានកាន់តែលឿន និងឆាប់រហ័សឆ្លើយតបទៅនឹងសំណើរ សំណូមពរ និងតម្រូវការ​របស់​បង​ប្អូនប្រជាពលរដ្ឋ ព្រមទាំងត្រូវចុះអន្តរាគមន៍ឲ្យបានទាន់ពេលវេលានៅពេលមាន​គ្រោះធម្មជាតិកើត​ឡើង​នៅមូលដ្ឋាន។

     ដោយឡែក ចំពោះអនុគណៈកម្មការរៀបចំពិធីប្រណាំងទូកទាំងអស់ ត្រូវតាមដាន និងចុះពិនិត្យនូវរាល់​ការងារ​ទទួលខុសត្រូវរបស់ខ្លួន ដើម្បីចាត់ចែងកិច្ចការដែលនៅសេសសល់ឲ្យបានរួចរាល់​ជាស្ថាពរមុនពិធី​ប្រណាំងទូកផ្លូវការចាប់ផ្ដើម ដើម្បីឲ្យពិធីប្រណាំងទូកឆ្នាំនេះ ប្រព្រឹត្តដោយរលូន និងទទួលបានលទ្ធផលជោគ​ជ័យ​តាមការគ្រោងទុក ជាពិសេសត្រូវខិតខំយកចិត្តទុកដាក់ថែរក្សាការពារសន្ដិសុខ សុវត្ថិភាព សណ្ដាប់ធ្នាប់​ឲ្យ​បាន​ល្អប្រសើរជូនបងប្អូនប្រជាពលរដ្ឋដែលអញ្ជើញមកទស្សនា និងលេងកម្សាន្តនៅក្នុងពិធីនេះ៕សិដ្ឋ

ប្រភព៖ រដ្ឋបាលខេត្តស្វាយរៀង