រដ្ឋបាលខេត្តស្វាយរៀង បានសហការជាមួយលេខាធិការដ្ឋាន នៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ. ប) រៀបចំវគ្គបណ្ដុះបណ្ដាលជាកាតព្វកិច្ច ស្ដីពីការលើកកម្ពស់បរិយាប័ន្ន និងសមធម៌សង្គមក្នុងភាពជាអ្នកដឹកនាំ កាលពីថ្ងៃពុធ ១៥កើត ខែអស្សុជ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៤ ខែតុលា ឆ្នាំ២០១៨ នៅសាលប្រជុំនាគព័ន្ធ អគារ ឆ សាលាខេត្តស្វាយរៀង ដែលប្រព្រឹត្តទៅក្រោមអធិបតីភាពលោកជំទាវ គឹម ស៊ីផាត់ អគ្គនាយក នៃអគ្គនាយកដ្ឋានសមធម៌យេនឌ័រ និងអភិវឌ្ឍន៍សេដ្ឋកិច្ច ក្រសួងកិច្ចការនារី និងមានការអញ្ជើញចូលរួមពីឯកឧត្ដម ជុំ ហាត ប្រធានក្រុមប្រឹក្សាខេត្ត ឯកឧត្ដម ប្រាក់ សុវណ្ណ អភិបាលរងខេត្ត តំណាងឯកឧត្ដមអភិបាលខេត្ត ឯកឧត្ដម លោកជំទាវសមាជិក សមាជិកាក្រុមប្រឹក្សាខេត្ត អភិបាលរងខេត្ត ក្រុមការងារលេខាធិការដ្ឋាន គ.ជ.អ.ប និងមន្ត្រីពាក់ព័ន្ធថ្នាក់ខេត្ត សរុប ៣៩នាក់ ស្រី ១៨នាក់ ។
សូមបញ្ជាក់ថា វគ្គបណ្ដុះបណ្ដាលនេះរៀបចំឡើងក្នុងគោលបំណង ដើម្បីបង្កើនការយល់ដឹង និងការផ្លាស់ប្ដូរនូវឥរិយាបថរបស់ថ្នាក់ដឹកនាំជាបុរស ដោយផ្ដោតការយកចិត្តទុកដាក់បន្ថែមទៀតលើបញ្ហាយេនឌ័រ បរិយាប័ន្ន និងសមធម៌សង្គមនៅរដ្ឋបាលថ្នាក់ក្រោមជាតិ ព្រមទាំងសម្របសម្រួលឲ្យថ្នាក់ដឹកនាំមានលទ្ធភាពរៀបចំអនុវត្តគម្រោងសកម្មភាព និងវិភាជន៍ថវិកា ដែលផ្ដល់ផលជាវិជ្ជមានពិតប្រាកដដល់ស្ត្រី និងក្រុមងាយរងគ្រោះផ្សេងៗទៀត៕សិដ្ឋ
ប្រភព៖ រដ្ឋបាលខេត្តស្វាយរៀង
