នៅព្រឹកថ្ងៃអង្គារ ១៤កើតខែអស្សុជ ឆ្នាំច សំរឹទ្ធិស័ក ព.ស២៥៦២ត្រូវនឹងថ្ងៃ២៣ ខែតុលា ឆ្នាំ២០១៨ នេះ ឯកឧត្តម ជា សុមេធី អភិបាល នៃគណៈអភិបាលខេត្តព្រៃវែង និងលោកជំទាវ ព្រមជាមួយ ឯកឧត្តម ស សុខា អនុប្រធានសហភាពសហព័ន្ធយុវជនកម្ពុជា និងជារដ្ឋលេខាធិការក្រសួងអប់រំ យុវជន និងកីឡា និងលោកជំទាវ ព្រមទាំងក្រុមការងារផលិតទូក "ង "វែងជាងគេបានរៀបចំពិធី សែនក្រុងពាលី នៅទីតាំង អតីតកំពង់ចម្លងអ្នកលឿងត្រើយខាងកើត ក្រោមអធិបតីភាព លោកជំទាវ ញ៉ែម សាខន ស ខេង ដើម្បីសុំសេចក្តីសុខ សេចក្តីចម្រើនដល់ប្រជាពលរដ្ឋ ដែលរស់នៅតំបន់នោះ និងក្រុមការងារដែលនឹងត្រៀមរៀបចំពិធី បំបែកកំណត់ត្រាឯតទគ្គកម្មពិភពលោក នាខែវិច្ឆិកា ឆ្នាំ២០១៨ ខាងមុខនេះ។
សូមបញ្ជាក់ថា ពិធីបំបែកកំណត់ត្រាឯតទគ្គកម្មពិភពលោកទូក"ង" វែងជាងគេ នឹងប្រព្រឹត្តទៅ នាថ្ងៃទី១២ ខែវិច្ឆិកា ឆ្នាំ២០១៨ ខាងមុខនេះ ចាប់ផ្តើមពីម៉ោង ៦:០០ព្រឹក នៅតំបន់ប្រជុំជន អ្នកលឿងត្រើយខាងកើត នៅក្នុងឃុំព្រែកខ្សាយ ខ ស្រុកពាមរក៍ ខេត្តព្រៃវែង ក្រោមអធិបតី សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ ។ ជាមួយគ្នានោះដែរក៏មានការអញ្ជើញចូលរួមពីឯកឧត្តម ហ៊ុន ម៉ានី ប្រធានសហភាពសហព័ន្ធយុវជន កម្ពុជា ,តំណាង Guinness World Records, ថ្នាក់ដឹកនាំ មន្ត្រីរាជការ កងកំលាំងប្រដាប់ អាវុធ ស.ស.យ.ក សិស្ស និស្សិត ព្រមទាំងប្រជាពលរដ្ឋជាច្រើនទៀត។ បន្ថែមលើសពីនេះក្នុងពិធី បំបែកកំណត់ត្រាឯតទគ្គកម្មពិភពលោក ទូក "ង "វែងជាងគេ នោះដែរ ក៏នឹងមានការ ប្រណាំងទូក" ង "ខេត្តព្រៃវែងផងដែរ។
គួររំលឹកថា ទូក "ង "វែងជាងគេឈ្មោះថា “ កម្ពោជិកបុត្តាខេមរាតរី ” ត្រូវបានផ្តួចផ្តើមកសាង ឡើងដោយឯកឧត្តម ស សុខា អនុប្រធានសហភាពសហព័ន្ធយុវជនកម្ពុជា ទទួលបន្ទុក ៣ ខេត្ត ( ព្រៃវែង បាត់ដំបង និងបន្ទាយមានជ័យ ) និងជាប្រធានគណៈកម្មការផលិតទូក "ង "វែងជាងគេនេះ និងការគាំទ្រពីសំណាក់ថ្នាក់ដឹកនាំ មន្ត្រីរាជការ សិស្ស និស្សិត ស.ស.យ.ក ព្រមទាំងបងប្អូនប្រជាពលរដ្ឋរាប់ពាន់នាក់ ទូទាំង ព្រះរាជាណាចក្រកម្ពុជា ផងដែរ៕ គឹមអាន
ប្រភព៖ រដ្ឋបាលខេត្តព្រៃវែង
