លោក លីសំរឹទ្ធ អភិបាលរង ខេត្តសៀមរាប តំណាងដ៏ខ្ពង់ខ្ពស់របស់ឯកឧត្តម បណ្ឌិត ឃឹម ប៊ុនសុង អភិបាល នៃគណៈអភិបាលខេត្តសៀមរាប បានអនុញាតអោយគណៈប្រតិភូសាធារណរដ្ឋឥណ្ឌូនេស៊ីចំនួន ២រូបដែលដឹកនាំដោយឯកឧត្ដម Sudirman Haseng ឯកអគ្គរដ្ឋទូតវិសាមញ្ញ និងពេញសមត្ថភាព ឥណ្ឌូនេស៊ីប្រចាំកម្ពុជា ចូលជួបសម្ដែងការគួរសម និងពិភាក្សាការងារកាលពីរសៀលថ្ងៃសុក្រ១០កើត ខែអស្សុជ ឆ្នាំ ច សំរឹទ្ធស័ក ព.ស ២៥៦២ ត្រូវនឹងថ្ងៃ ១៩ ខែតុលា ឆ្នាំ ២០១៨ ដោយមានការចូលរួមពីនាយករងរដ្ឋបាលសាលាខេត្ត អនុប្រធានមន្ទីរទេសចរណ៍ខេត្ត និងអភិបាលរងក្រុងសៀមរាបផងដែរ។ កិច្ចជួបពិភាក្សា និងសម្ដែងការគួរសមនេះបានផ្ដោតសំខាន់ទៅលើ វិស័យទេសចរណ៍ វប្បធម៌ អបរំ វិនិយោគ ឧស្សាហកម្ម ពាណិជ្ជកម្ម និងវិស័យផ្សេងៗទៀតផងដែរ។
ជាមួយគ្នានេះលោក លី សំរឹទ្ធ បានសំណូមពរឲ្យ ឯកឧត្ដម Sudirman Haseng បន្តរឹតចំណងមិត្តភាពរវាងខេត្តសៀមរាប និងស្ថានទូឥណ្ឌូនេស៊ី ផ្លាស់ប្ដូរ និងផ្ដល់បទពិសោធន៍ការងារអភិវឌ្ឍលើគ្រប់វិស័យប្រកបដោយចេរភាព។
ទន្ទឹមនឹងនោះ ឯកឧត្ដម Sudirman Haseng បានស្នើសុំថ្នាក់ដឹកនាំខេត្តដើម្បីធ្វើការតាំងពិព័ណ រវាងវប្បធម៌ឥណ្ឌូនេស៊ី និងកម្ពុជា ក្នុងខេត្តសៀមរាបក្នុងកំឡុងខែ មេសា ឆ្នាំ ២០១៩ខាងមុខនេះដើម្បីឲ្យការទំនាក់ទំនង និងសម្ដែងសិល្បៈវប្បធម៌ដើម្បីឲ្យការទំនាក់ទំនងយ៉ាងជិតស្និតរវាងប្រទេសទាំងពីរ៕ គឹមអាន
ប្រភព៖ រដ្ឋបាលខេត្តសៀមរាប