នៅថ្ងៃទី១៦ ខែឧសភា ឆ្នាំ២០២៣ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត និងលោកជំទាវ ជ័យ ណារី អ៊ុំរាត្រី អនុប្រធានកិត្តិយសសាខាកាកបាទប្រហមកម្ពុជាខេត្ត បាកដឹកនាំក្រុមការងារ និងថ្នាក់ដឹកនាំសាលាខេត្ត បាននាំយកអំណោយ និងសួរសុខទុក្ខជនរងគ្រោះដោយសារគ្រាប់មីន នៅមន្ទីរពេទ្យបង្អែកមិត្តភាព កម្ពុជា-ជប៉ុន ក្នុងស្រុកមង្គលបូរី។

ជនរងគ្រោះមានឈ្មោះ លី លាក់ ភេទប្រុស អាយុ ៣៧ឆ្នាំ រស់នៅភូមិសិលាខ្មែរ ឃុំអូរបីជាន់ ស្រុកអូរជ្រៅ ករណីនេះ បានកើតឡើង នៅព្រឹកថ្ងៃទី១៦ ខែឧសភា ឆ្នាំ២០២៣ ជនរងគ្រោះ បានដើររកបេះស្លឹកព្រិច និងរកចាប់សត្វ នៅចំណុចក៥ ភូមិសិលាខ្មែរ (ព្រំដែន) ទើបបណ្តាលឱ្យជាន់មីរងរបួសដាច់ជើងខាងឆ្វេង។

សូមបញ្ជាក់ថា អំណោយដែលសាខាកាកបាទក្រហមកម្ពុជាខេត្តបន្ទាយមានជ័យ ផ្ដល់ជូនជនរងគ្រោះនាពេលនេះ រួមមាន ៖ ទឹកសុទ្ធ ២កេស, ទឹកដោះគោឆៅ ២ឡូតិ៍, មី ១កេស, ត្រីខ ២យួរ និងថវិកាមួយចំនួនទៀត។ ចំពោះ ឯកឧត្តម អភិបាលខេត្ត ក៏បានឧបត្ថម្ភបន្ថែមមានទឹកដោះគោឆៅ ២ឡូត៍ និងថវិកាមួយចំនួនទៀត៕

ប្រភព ៖ រដ្ឋបាលខេត្តបន្ទាយមានជ័យ