នៅព្រឹកថ្ងៃទី១៤ ខែមករា ឆ្នាំ២០២៣ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង រួមជាមួយលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង និងថ្នាក់ដឹកនាំខេត្ត មន្ទីរ អង្គភាព ស្រុក ឃុំ អញ្ជើញអមដំណើរសម្ដេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ជាព្រះរាជតំណាងដ៏ខ្ពង់ខ្ពស់បំផុត ព្រះមហាក្សត្រ និងសម្តេចព្រះមហាក្សត្រី ព្រះវររាជមាតាជាតិខ្មែរ នាំយកព្រះរាជអំណោយចែកជូនប្រជារាស្ត្រ ដែលទទួលរងគ្រោះដោយជំនន់ទឹកភ្លៀង ក្នុងស្រុកសាមគ្គីមានជ័យ ចំនួន ២១២គ្រួសារ។ 

ក្នុងឱកាសនោះ សម្ដេចចៅហ្វាវាំង បានពាំនាំនូវព្រះរាជបណ្ដាំសួរសុខទុក្ខរបស់ព្រះអម្ចាស់ជីវិតលើត្បូង ព្រះមហាក្សត្រ និងសម្តេចព្រះមហាក្សត្រី ព្រះវររាជមាតាជាតិខ្មែរ ជូនប្រជារាស្ត្ររងគ្រោះ នៅក្នុងឃុំចំនួន៥ នៃស្រុកសាមគ្គីមានជ័យ និងព្រះរាជបណ្ដាំចូលរួមរំលែកទុក្ខចំពោះគ្រួសារដែលបានបាត់បង់ជីវិតសមាជិកម្នាក់ដោយលង់ទឹក។ 

ព្រះរាជអំណោយដែលបានចែកជូនប្រជារាស្ត្ររងគ្រោះទាំង ២១២គ្រួសារ ក្នុងមួយគ្រួសារទទួលបាន អង្ករ ៥០គីឡូក្រាម តង់១ ឃីត១ (មី ២កេស អាវយឺត១ មុង១ សារុង១ ភួយ១ ក្រម៉ា១ ម៉ាស់ ១ប្រអប់) និងថវិកា ៤០ម៉ឺនរៀល។ ចំពោះគ្រួសារដែលបានបាត់បង់ជីវិតសមាជិកម្នាក់ ទទួលបាន អង្ករ ៥០គីឡូក្រាម តង់១ ឃីត១ (មី ២កេស អាវយឺត១ មុង១ សារុង១ ភួយ១ ក្រម៉ា១ ម៉ាស់ ១ប្រអប់) និងថវិកា ៨០ម៉ឺនរៀល៕

ប្រភព៖ រដ្ឋបាលខេត្តកំពង់ឆ្នាំង