នាព្រឹកថ្ងៃពុធ ០៨កើត ខែអស្សុជ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៧ ខែតុលា ឆ្នាំ២០១៨នេះ ឯកឧត្ដម ប្រាក់ សុវណ្ណ អភិបាលរងខេត្តស្វាយរៀង បានអញ្ជើញជាអធិបតីក្នុងសិក្ខាសាលាផ្សព្វផ្សាយស្តីពី វប្បធម៌បង់ពន្ធ និងបទប្បញ្ញត្តិពន្ធដារ ដែលសហការរៀបចំដោយនាយកដ្ឋានគ្រប់គ្រងអ្នកជាប់ពន្ធតូច និងមធ្យម នៃអគ្គនាយកដ្ឋានពន្ធដារ និងសាខាពន្ធដារខេត្តស្វាយរៀង។
សិក្ខាសាលានេះធ្វើឡើងក្នុងគោលបំណងផ្សព្វផ្សាយ និងបញ្ច្រាបនូវបទប្បញ្ញត្តិស្តីពីសារពើពន្ធ និងលិខិតបទដ្ឋាន គតិយុត្តនានា ជាពិសេសពាក់ព័ន្ធសិទ្ធិ និងកាតព្វកិច្ចរបស់អ្នកជាប់ពន្ធអាករ ដល់លោក លោកស្រីជាអភិបាល ឬ អ្នកតំណាងស្របច្បាប់របស់ក្រុមហ៊ុននានាដែលមានមូលដ្ឋាននៅក្នុងខេត្តស្វាយរៀង សំដៅធានាអនុវត្តឲ្យបាន ត្រឹមត្រូវ តាមតួនាទីភារកិច្ចរបស់ខ្លួន ស្របតាមនីតិវិធីកំណត់ និងប្រកបដោយតម្លាភាព ក៏ដូចជាដើម្បីបង្កើនភាព ជឿជាក់ និងទំនុកចិត្តពីសំណាក់អ្នកជាប់ពន្ធមកលើអាជ្ញាធរសាធារណៈ៕ អែមមី
ប្រភពៈរដ្ឋបាលខេត្តស្វាយរៀង