នាថ្ងៃចន្ទ ទី៩ ខែមករា ឆ្នាំ២០២៣ លោក សុខ សុទ្ធី អភិបាលរង នៃគណៈអភិបាលខេត្តកោះកុង អញ្ជើញដឹកនាំកិច្ចប្រជុំពិនិត្យសំណើសូមធ្វើស្ពានមួយកន្លែងជូនប្រជាពលរដ្ឋ នៅសង្កាត់ស្មាច់មានជ័យ ក្រុងខេមរភូមិន្ទ។
ដោយមានការអនុញ្ញាតពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង លោក សុខ សុទ្ធី អភិបាលរង នៃគណៈអភិបាលខេត្តកោះកុង បានអញ្ជើញដឹកនាំកិច្ចប្រជុំពិភាក្សាពិនិត្យលើសំណើរបស់ប្រជាពលរដ្ឋឈ្មោះ យុ ភិន ដែលបានដាក់ពាក្យមករដ្ឋបាលខេត្ត ដើម្បីស្នើសូមសាងសង់ស្ពានមួយកន្លែង មានទំហំទទឹងប្រមាណ ១២ម៉ែត្រ និងបណ្តោយប្រហែល ៥៣ម៉ែត្រ ស្ថិតនៅក្បែរស្ពានភូមិន្ទ ផ្លូវលេខ៩០០ ភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។
បន្ទាប់ពីកិច្ចប្រជុំពិភាក្សា និងផ្អែកលើទីតាំងស្នើសុំ ដែលជាទីតាំងជាប់នឹងបណ្តោយផ្លូវលេខ ៩០០ និងដើម្បីលើកកម្ពស់សោភណ្ឌភាពទីក្រុង ព្រមទាំងដើម្បីបម្រើប្រយោជន៍សាធារណៈផងនោះ អង្គប្រជុំបានសម្រេចឯកភាព អនុញ្ញាតឱ្យសាងសង់ស្ពាននៅលើទីតាំងដែលស្នើសូមនេះ។
ប្រភព៖ រដ្ឋបាលខេត្តកោះកុង