នាព្រឹកថ្ងៃពុធ ៨កើត ខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៧ ខែតុលា ឆ្នាំ២០១៨ នៅខេត្តសៀមរាប បានប្រារព្ធពិធីក្រុងពិលី និងបញ្ចុះបឋមសិលា ដើមី្បសុំនូវម្ចាស់ទឹកម្ចាស់ដី ព្រៃព្រឹក្សានៃប្រាសាទចៅស្រីវិបុល ក្នុងការសាងសង់អគារសិក្សា ១ខ្នង មាន៥បន្ទប់ ដែលជាអំណោយដ៏សប្បុរសធម៌ របស់សមាគម វី-ឆារីឋេបល ហ្វោនដេសិន ដោយមានការអញ្ជើញចូលរួមពីឯកឧត្តមបណ្ឌិត ឃឹម ប៊ុនសុង អភិបាលនៃគណៈអភិបាលខេត្តសៀមរាប និងលោកជំទាវ រួមទាំងមន្ត្រីរាជការនានា និងតំណាងសមាគម វី-ឆារីឋេបល ហ្វោនដេសិន និងសហការីផងដែរ។
ក្នុងឱកាសនោះ ឯកឧត្តមបណ្ឌិត ឃឹម ប៊ុនសុង បានថ្លែងថា សាលារៀនគឺជាឃ្លាំងនៃចំណេះដឹងទូទៅ សម្រាប់ការបណ្តុះបណ្តាលសិស្សានុសិស្ស ពីជំនាន់មួយទៅជំនាន់មួយទៀត ឲ្យក្លាយជាធនធានមនុស្ស ឆ្លើយតបការអភិវឌ្ឍប្រទេសជាតិ។ សាលារៀន និង ករសិក្សាអបរំ គឺជាឃ្លាំងនៃចំណេះដឹងទូទៅ ដែលមានលោកគ្រូ អ្នកគ្រូ ជាស្ថាបនិកផលិតធនធានមនុស្ស ក្រោមការខិតខំ លះបង់ពេលវេលា បណ្តុះបណ្តាលសិស្ស ពីជំនាន់មួយទៅជំនាន់មួយទៀត ដើម្បីអនាគតកូនចៅប្រជាពលរដ្ឋ និងដើម្បីបុព្វហេតុនៃការអភិវឌ្ឍប្រទេសជាតិ។ បើគ្មានការអប់រំទេនោះ គឺមិនអាចធ្វើឲ្យសង្គមមួយរីកចម្រើនបានឡើយ ការសិក្សាអប់រំ គឺជាកូនសោរសម្រាប់បើកទ្វារអនាគត។ ទន្ទឹមនឹងនោះ ឯកឧត្តមអភិបាលខេត្ត ក៏បានថ្លែងអំណរគុណ ចំពោះសមាគម វី-ឆារីឋេបល ហ្វោនដេសិន ដែលមានទឹកចិត្តសប្បុរសធម៌ បានជួយសាងសង់អគារសិក្សា ជូនប្រជាពលរដ្ឋក្នុងភូមិត្រាចនេះ ។ អេមមី
ប្រភព៖ រដ្ឋបាលខេត្តសៀមរាប