ក្រសួងមហាផ្ទៃ បិទវគ្គបណ្តុះបណ្ដាលឡើងវិញស្ដីពី “បែបបទ និងនីតិវិធីនៃការផ្តល់សេវារដ្ឋបាល របស់អង្គភាពច្រកចេញចូលតែមួយរាជធានី-ខេត្ត” នៅខេត្តក្រចេះ វគ្គបណ្តុះបណ្ដាលឡើងវិញស្ដីពី “បែបបទ និងនីតិវិធីនៃការផ្តល់សេវារដ្ឋបាល របស់អង្គភាពច្រកចេញចូលតែមួយរាជធានី-ខេត្ត រយៈពេល២ថ្ងៃ ធ្វើឡើងនៅខេត្តក្រចេះ ក្រោមអធិបតីភាពកឧត្តម ប្រាក់ សំអឿន អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ និងឯកឧត្តម វ៉ា ថន អភិបាលនៃគណៈអភិបាលខេត្តក្រចេះ ដែលសិក្ខាកាមជាមន្ត្រីបុគ្គលិកជួរមុខ និងជួរក្រោយនៃអង្គភាពច្រកចេញចូលតែមួយនៃរដ្ឋបាលរាជធានីខេត្តចំនួន១៩ ខេត្ត សរុប ១៤៤ នាក់ ។
ក្នុងពិធីឯកឧត្តម វ៉ា ថន អភិបាលខេត្តបានមានប្រសាន៍លើកឡើងថា ៖ ការបង្កើតឱ្យមានយន្តការច្រកចេញចូលតែមួយនៅគ្រប់ថ្នាក់រដ្ឋបាលនៃរដ្ឋបាលថ្នាក់ក្រោមជាតិ ពិតជាបានផ្ដល់ភាពងាយស្រួលដល់ប្រជាពលរដ្ឋក្នុងការស្នើសុំសេវា ដោយសារតែសេវារដ្ឋបាលដែលជាតម្រូវការចាំបាច់របស់ប្រជាពលរដ្ឋត្រូវបានប្រមូលផ្ដុំឱ្យមកស្ថិតនៅកន្លែងតែមួយ និងមានការទទួលខុសត្រូវច្បាស់លាស់ ។
ប្រជាពលរដ្ឋអាចមកដាក់ពាក្យស្នើសុំសេវា និងមកទទួលលទ្ធផលសម្រេចវិញនៅកន្លែងតែមួយ ដែលបានចូលរួមចំណែកកាត់បន្ថយការចំណាយថវិកាក្រៅផ្លូវការ និងសន្សំសំចៃពេលវេលាជូនប្រជាពលរដ្ឋ ។ ទន្ទឹមនេះ ការបង្កើតឱ្យមានយន្តការច្រកចេញចូលតែមួយ ក៏បានចូលរួមចំណែកលើលកម្ពស់ការទទួលខុសត្រូវរបស់រដ្ឋបាលថ្នាក់ក្រោមជាតិ និងបង្កើនលទ្ធភាពក្នុងការប្រមូលចំណូលនៅក្នុងមូលដ្ឋាននីមួយៗ ដែលចំណូលទាំងអស់នេះត្រូវបានយកប្រើប្រាស់ក្នុងការអភិវឌ្ឍហេដ្ឋារចនាសម្ព័ន្ធនានាក្នុងមូលដ្ឋាន និងបម្រើផលប្រយោជន៍ជាទូទៅសម្រាប់ប្រជាពលរដ្ឋ ។
មានប្រសានស៍បន្ថែមឯកឧត្តម ប្រាក់ សំអឿន អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ ៖ គោលដៅសំខាន់នៃការបង្កើតយន្តការច្រកចេញចូលតែមួយនៅរដ្ឋបាលថ្នាក់ក្រោមជាតិ គឺដើម្បីការធ្វើឱ្យប្រសើរឡើងនូវការផ្ដល់សេវារដ្ឋបាល តាមរយៈការប្រមូលផ្តុំសេវានៅកន្លែងតែមួយ និងការបង្ខិតសេវាឱ្យទៅកៀកជិតជាមួយនឹងប្រជាពលរដ្ឋ សំដៅធ្វើយ៉ាងណាធានាឱ្យការផ្ដល់សេវាមានភាពងាយស្រួលដល់អ្នកស្នើសុំសេវាតាមរយៈនីតិវិធីសាមញ្ញ រហ័ស មានតម្លាភាព ប្រសិទ្ធភាព និងឆ្លើយតបទាន់ពេលវេលានូវសំណូមពរនានារបស់អ្នកស្នើសុំសេវា ។
សម្រាប់ការធ្វើកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ នាពេលកន្លងមក រាជរដ្ឋាភិបាលបានដាក់ចេញនូវកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ (២០២១-២០៣០) ដែលមានចក្ខុវិស័យក្នុងការពង្រឹងរដ្ឋបាលថ្នាក់ក្រោមជាតិឱ្យកាន់តែមានសមត្ថភាពខ្ពស់ក្នុងការអភិវឌ្ឍមូលដ្ឋាន និងផ្ដល់សេវាសាធារណៈជូនប្រជាពលរដ្ឋ ដើម្បីអភិវឌ្ឍកម្ពុជាឱ្យក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ ។
ឯគឧត្តមបន្តថា ៖ កម្មវិធីជាតិនេះមានសមាសភាគធំៗចំនួន៥ ដែលក្នុងនោះលទ្ធផលរំពឹងទុកនៃសមាសភាគទី៥ បានកំណត់ឱ្យមានការកែលម្អ និងពង្រឹងការអនុវត្តយន្តការច្រកចេញចូលតែមួយ សម្រាប់ការផ្តល់សេវារដ្ឋបាលនៅរដ្ឋបាលថ្នាក់ក្រោមជាតិ ដើម្បីឱ្យការផ្តល់សេវាកាន់តែមានភាពសាមញ្ញ ងាយស្រួល មានប្រសិទ្ធភាព និងមានតម្លាភាព តាមរយៈការរៀបចំ និងការប្រើប្រាស់ប្រព័ន្ធបច្ចេកវិទ្យាព័ត៌មានវិទ្យាសម្រាប់ការផ្តល់សេវា ។ ជាមួយគ្នានេះ កម្មវិធីជាតិក៏បានកំណត់នូវសកម្មភាពជាអាទិភាពមួយចំនួន ដែលក្នុងនោះសកម្មភាពអាទិភាពជាចម្បង គឺការផ្តល់សេវារដ្ឋបាលតាមប្រព័ន្ធអនឡាញដែលអនុញ្ញាតឱ្យប្រជាពលរដ្ឋអាចស្នើសុំសេវា បង់កម្រៃសេវា និងតាមដានដំណើរការនៃការស្នើសុំសេវាតាមប្រព័ន្ធព័ត៌មានវិទ្យាបានដោយខ្លួនឯង ។
ឯកឧត្តបន្តទៀតថា ៖ មេរៀនទាំងនេះ មិនមានលក្ខណៈជាទ្រឹស្ដីពេកនោះទេ ប៉ុន្ដែវាជាមេរៀនដែលបានផ្សារភ្ជាប់ជាមួយបទពិសោធន៍ជាក់ស្ដែង ដែលបានអនុវត្តកន្លងមកហើយ ហើយសង្ឃឹមថា មន្រ្តីបុគ្គលិកជួរមុខ និងជួរក្រោយពិតជាអាចមានសមត្ថភាព និងអាចបំពេញភារកិច្ចទាំងអស់នេះបានដោយជោគជ័យ និងមានប្រសិទ្ធភាពខ្ពស់ ដើម្បីរួមចំណែកក្នុងការអនុវត្ដឱ្យបានសម្រេចនូវគោលនយោបាយវិមជ្ឈការ និងវិសហមជ្ឈការ និងយុទ្ធសាស្ដ្រចតុកោណដំណាក់កាលទី៤របស់រាជរដ្ឋាភិបាល ៕
ប្រភព៖រដ្ឋបាលខេត្តក្រចេះ