នាព្រឹកថ្ងៃសុក្រ១១រោចខែភទ្របទឆ្នាំច សំរឹទ្ធិស័ក ព.ស២៥៦២ត្រូវនឹងថ្ងៃទី០៥ខែតុលា ឆ្នាំ២០១៨ ក្រោយពីរដ្ឋបាលខេត្តបានបើកកិច្ចប្រជុំក្រុមការងារ និងអាជីវករ ដើម្បីត្រៀមរៀបចំនិងគ្រប់គ្រងសណ្តាប់ធ្នាប់របៀបរៀបរយសាធារណ:នៅតាមបណ្តោយឆ្នេររបស់ខេត្តកែប លោកឧត្តមសេនីយ៍ត្រី បែន តារា ស្នងការនគរបាលខេត្តកែប បានចាត់តាំងផែនសណ្តាប់ធ្នាប់ ចុះសហការជាមួយមន្ទីរទេសចរណ៍ខេត្តកែប ចុះត្រួតពិនិត្យ ណែនាំគ្រប់មូលដ្ឋានអាជីវកម្មតំបន់ទេសចរណ៍ឆ្នេរ និងផ្សារក្តាមទាំងអស់ត្រូវដាក់បង្ហាញតម្លៃ តាមផលិតផល និងសេវាកម្មរបស់ខ្លួន ហើយប្រសិនករណីបើពុំគោរពតាមការណែនាំនោះទេ នឹងមានវិធានការពិន័យតឹងរឹងបំផុត។
ដោយឡែកលោកស្នងការនគរបាលខេត្ត ក៏បានចាត់តាំងកំលាំងនគរបាលខេត្ត ក្រុង ស្រុកនិងប៉ុស្តិ៍រដ្ឋបាល បន្តពង្រឹងការ គ្រប់គ្រងសន្តិសុខ សុវត្ថិភាពនៅគ្រប់គោលដៅសំខាន់ៗ និងជម្រុញឲ្យមានការបង្កើតបណ្តាញសន្តិសុខស្ម័គ្រចិត្ត នៅតាមមូលដ្ឋានតាមរយះការចូលរួមពីប្រជាពលរដ្ឋ ប្រតិបត្តិករទេសចរណ៍ និងអាជីវករផងដែរ៕ គឹមអាន
ប្រភព៖ រដ្ឋបាលខេត្តកែប
