នៅរសៀលថ្ងៃចន្ទ ទី១៩ ខែកញ្ញា ឆ្នាំ២០២២នេះ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តស្ទឹងត្រែងបានអញ្ជើញដឹកនាំកិច្ចប្រជុំពិនិត្យ វាយតម្លៃកម្រិតកែប្រែរបស់ទណ្ឌិតដែលត្រូវដាក់ស្នើបន្ធូរបន្ថយទោស និងលើកលែងទោស ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក និងពិធីបុណ្យឯករាជ្យជាតិឆ្នាំ ២០២២ ខាងមុខនេះ។
កិច្ចប្រជុំនេះមានការចូលរួមពីព្រះរាជអាជ្ញារង លោកនាយក នាយករងរដ្ឋបាលសាលាខេត្តស្នងការរងទទួលបន្ទុក ប្រធាពន្ធនាគារនិងមន្រ្តីពាក់ព័ន្ធមួយចំនួនទៀត។
មានប្រសាសន៍ក្នុងកិច្ចប្រជុំ ឯកឧត្តម ស្វាយ សំអ៊ាង បានស្នើឱ្យមន្ត្រីជំនាញនិងសមត្ថកិច្ច ពាក់ព័ន្ធ ទាំងអស់ត្រូវពិនិត្យនិងពិភាក្សាឱ្យបានល្អិតល្អន់ និងគ្រប់ជ្រុងជ្រោយ ក្នុងការបន្ធូរបន្ថយទោស និង លើកលែងទោសឱ្យទណ្ឌិតធ្វើយ៉ាងណាសមស្រប ទៅនឹងច្បាប់និងគោលការណ៍ណែនាំនានា។
ឯកឧត្តម អភិបាលខេត្ត បន្តថាការពិនិត្យឱ្យបានល្អិតល្អន់នេះ គឺដើម្បីជ្រើសរើសបានទណ្ឌិតដែលបានស្នើសុំ ការបន្ធូរបន្ថយទោស និងលើកលែងទោសជាអ្នកមានការតាំងចិត្តកែប្រែខ្លួនឱ្យក្លាយជាពលរដ្ឋល្អ ក្នុងសង្គមជាតិ ពិតប្រាដកអាចរស់នៅប្រកបដោយសេចក្តីសុខជាមួយក្រុមគ្រួសារ ក៏ដូចជាក្នុងសង្គមទាំងមូល។
លោកប្រាជ្ញសុភី ប្រធានពន្ធនាគារខេត្ត បានឱ្យដឹង ថា៖ «អង្គភាពពន្ធនាគារខេត្តស្ទឹងត្រែង បានជ្រើសរើសយក ទណ្ឌិតចំនួន៤៤នាក់ ស្រី៥នាក់ មកដាក់ជូនគណៈកម្មការត្រួតពិនិត្យ និងវាយតម្លៃកម្រិតកែប្រែរបស់ទណ្ឌិត»៕
ប្រភព៖ រដ្ឋបាលខេត្តស្ទឹងត្រែង