កាលពីរសៀលថ្ងៃនៅថ្ងៃព្រហស្បតិ៍ ១០ រោចខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៤ ខែតុលា ឆ្នាំ ២០១៨ ឯកឧត្តម សុខ លូ អភិបាលខេត្តកំពង់ធំ និងឯកឧត្តម ឈុន ឈន់ ប្រធានក្រុមប្រឹក្សាខេត្ត អញ្ជើញចូលរួមជួបសំណេះសំណាល សួរសុខទុក្ខប្រជាពលរដ្ឋដែលកំពុងសម្រាកព្យាបាលជំងឺនៅមន្ទីរពេទ្យបង្អែកខេត្តកំពង់ធំ និងនាំយកអំណោយមួយចំនួនជូនពួកគាត់ផងដែរ។ ឯកឧត្តម បានថ្លែងអំណរគុណ ចំពោះលោកគ្រូ-អ្នកគ្រូពេទ្យទាំងអស់ ដែលបានយកអស់កម្លាំងកាយ កម្លាំងចិត្ត ដើម្បីព្យាបាលអ្នកជំងឺ ទោះក្នុងស្ថានភាពណាក៏ដោយ និងផ្តាំផ្ញើដល់លោកគ្រូ-អ្នកគ្រូពេទ្យ សូមមេត្តាប្រើឥរិយាបថសមរម្យចំពោះអ្នកជំងឺ ព្រោះទង្វើល្អ កាយវិការល្អ ពាក្យសំដីល្អៗ របស់លោកគ្រូ-អ្នកគ្រូ គឺជាឱសថយ៉ាងពូកែផ្នែកផ្លូវចិត្តមួយផងដែរ។
នៅរសៀលដដែរ ឯកឧត្តម និងសហការីបានចុះជួបសួរសុខទុក្ខកុមារកំព្រា នៅមណ្ឌលបុរីកុមារ ដោយមានផ្តាំផ្ញើដល់ក្មួយៗ ត្រូវយកចិត្តទុកដាក់ខិតខំរៀនសូត្រ ស្តាប់ការណែនាំពីលោកគ្រូ អ្នកគ្រូ មាតា បិតា និងត្រូវធ្វើខ្លួនជាកូនល្អ សិស្សល្អ ត្រូវជៀសឱ្យឆ្ងាយពីគ្រឿងញៀន ដើម្បីកសាងខ្លួន ប្រកបដោយសមត្ថភាព និងចំណេះដឹង អភិវឌ្ឍខ្លួនឲ្យបានថ្លែថ្នូរ រុងរឿង ល្អប្រសើរ ព្រោះចំណេះវិជ្ជា គឺជាធនធានរបស់ខ្លួនយើង ដើម្បីស្វែងរកការងារធ្វើ ទទួលបានជោគជ័យក្នុងជីវិត។ ឯកឧត្តម បានថ្លែងអំណរគុណដល់ម៉ែដោះ ដែលបានជួយបីបាច់ថែរក្សា និងស្រលាញ់ក្មួយៗ ដូចជាកូនបង្កើតរបស់ខ្លួន ជាពិសេស ក្មួយៗមិនឯកោទេ ដោយមានការយកចិត្តទុកដាក់ និងផ្តល់ភាពកក់ក្តៅពីរាជរដ្ឋាភិបាលកម្ពុជា ក៏ដូចជាថ្នាក់ដឹកនាំខេត្ត និងមន្ទីរផងដែរ៕ គឹមអាន
ប្រភព៖ រដ្ឋបាលខេត្តកំពង់ធំ