នាព្រឹកថ្ងៃទី៣០ ខែសីហា ឆ្នាំ២០២២នេះ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ, ឯកឧត្តម នោ ហ្យង់ជូន ប្រធានទីភ្នាក់ងារសហប្រតិបត្តិការអន្តរជាតិកូរ៉េ ប្រចាំព្រះរាជាណាចក្រកម្ពុជា(KOICA), ឯកឧត្តម អ៊ឹម សួរ ប្រធានសមាគមអតីតកម្មសិក្សាការីកម្ពុជា-កូរ៉េ និងលោក ស៊ុន រ៉ាវឿន តំណាងប្រធានក្រុមហ៊ុនហ៊ីយ៉ាន់ដាយ បានអញ្ជើញជាអធិបតីពិធីសំណេះសំណាល និងចែកអំណោយដល់សិស្សានុសិស្សចំនួន ០៣សាលា ក្នុងឃុំតាឡំ ស្រុកមង្គលបូរី ខេត្តបន្ទាយមានជ័យ។
នាឱកាសនោះ ឯកឧត្តម អ៊ុំ រាត្រី អភិបាលខេត្ត បានសម្តែងនូវការស្វាគមន៍ និងថ្លែងអំណរគុណដល់ KOICA និងក្រុមហ៊ុនហ៊ីយ៉ាន់ដាយ ព្រមទាំងសមាគម ដែលបានយកចិត្តទុកដាក់នាំយកអំណោយជាសម្ភារៈសិក្សា មកផ្តល់ជូនសិស្សានុស្ស និងសាលារៀននាពេលនេះ។ វាពិតជាមានតម្លៃសារៈសំខាន់ដើម្បីរួមចំណេកជួយទំនុកបម្រុងការខ្វះខាតរបស់ក្មួយៗសិស្សានុសិស្សជួបការលំបាក។
ឯកឧត្តមអភិបាលខេត្ត បានគូសបញ្ជាក់ថា តាមរយៈ KOICA តែងផ្តល់កិច្ចសហការ និងជួយដល់ប្រទេសកម្ពុជា ដោយឡែកនៅលើទឹកដីនៃខេត្តបន្ទាយមានជ័យផងដែរ។
សូមបញ្ជាក់ថា អំណោយឧបត្ថម្ភរបស់ KOICA និងក្រុមហ៊ុន ហ៊ីយ៉ាន់ដាយ បាននាំយកមកចែកជូនសិស្សានុសិស្សក្រីក្រតស៊ូរៀនសូត្រចំនួន ១០០នាក់ មកពីសាលាបឋមសិក្សាតាឡំ បឋមសិក្សាចុងគោក និងសាលាបឋមសិក្សាព្រះស្រែ សម្ភារៈអំណោយចែកជូនរួមមាន កង់១០០ កាបូបសិស្ស១០០ សៀវភៅ ៥០០ក្បាល ប៊ិច ១០០ដើម ថ្នាំដុសធ្មេញ ១០០ ច្រាស់ដុសធ្មេញ ១០០ សៀវភៅរឿងនិទានផ្សេងៗ ១០០ក្បាល វចនានុក្រមសម្តេចជួនណាត ៣ក្បាល ភូគោល៣ និងម៉ូទ័របូមទឹក ១សម្រាប់ស្រោចកូនឈើ ដែលត្រូវដាំចប់កម្មវិធី ២៥០ដើម៕
ប្រភព៖ រដ្ឋបាលខេត្តបន្ទាយមានជ័យ