នារសៀលថ្ងៃអង្គារទី១២ ខែកក្កដា ឆ្នាំ២០២២ ឯកឧត្តម វ៉ា ថន អភិបាលខេត្ត និងលោកជំទាវ ហឹង ណារី វ៉ាថន រួមសហការីអញ្ជើញនាំយកទៀនចំណាំព្រះវស្សា មកវេប្រគេនដល់ព្រះសង្ឃចំនួន១០វត្ត ក្នុងក្រុងក្រចេះ ដែលពិធីប្រព្រឹត្តទៅនៅក្នុងវត្តពោធិសត្ថារាម សង្កាត់អូរឫស្សី ក្រុងក្រចេះ ខេត្តក្រចេះ ។
ក្រោយពីឯកឧត្តមអភិបាលខេត្ត និងលោកជំទាវ រួមនិងសហការី បានបូជាទៀនធូប និងថ្វាយគ្រឿងសក្កាៈដល់ព្រះរតនត្រ័យរួចហើយនោះ ឯកឧត្តម វ៉ា ថន អភិបាលខេត្តក្រចេះ បានមានប្រសាសន៍គូសបញ្ជាក់ថា ៖ ការជួបជុំប្រារព្វកម្មវិធីបុណ្យនៅពេលនេះ គឺស្តែងឲ្យឃើញពីសាមគ្គីភាព និងកក្តាសេដ្ឋកិច្ចជាតិ ធ្វើឲ្យជីវភាពរបស់ប្រជាពលរដ្ឋមានភាពធូរធារសម្បូរសប្បាយ ដោយមិនមានភាពភ័យខ្លាចពីសន្តិសុខសុវត្ថិភាព ក្នុងការគោរពប្រណិបត្តិទៅតាមគន្លងប្រពៃណីសាសនារបស់ខ្លួន ។
ដែលទាំងនេះគឺមកពីកត្តាសុខសន្តិភាពរបស់ប្រជាជាតិ និងសហគមន៍ ជាពិសេសដោយសារគុណបុណ្យថ្នាំវ៉ាក់សាំងការពារជំងឺកូវីដ-១៩ របស់ប្រមុខរាជរដ្ឋាភិបាលកម្ពុជា គឺសម្តេចតេជោ ហ៊ុន សែន បានសម្រេចយ៉ាងត្រឹមត្រូវក្នុងការប្រើប្រាស់នូវយុទ្ធសាស្រ្តស្រោចវ៉ាក់សាំងការពារជំងឺកូវីដ-១៩ ដល់មនុស្សគ្រប់រូប ដែលរស់សហគមន៍ទាំងមូល ធ្វើឲ្យសហគមន៍មានប្រព័ន្ធការពារភាពសាំ ប្រឆាំងនឹងការឆ្លង និងឆ្លងធ្ងន់ធ្ងរពីជំងឺកូវីដ-១៩ ។
ឯកឧត្តមអភិបាលខេត្តបន្តថា ៖ តបតាមអនុសាសន៍ដ៏ខ្ពង់ខ្ពស់របស់សម្តេចតេជោ បានបញ្ជាក់ថាទោះបីឋិតនៅក្នុងកាលៈទេសៈណាក៏ដោយ បុណ្យទាននៅតែធ្វើនិងនាំយកមកប្រគេនដល់ព្រះសង្ឃ បើទោះបីអំណោយសម្ភារៈ និងបច្ច័យនោះតិចតួចក្តី តែនេះជាក្តីព្រួយបារម្មណ៍ និងការយកចិត្តទុកដាក់របស់អាជ្ញាធរ ។
ឯកឧត្តមក៏បានជម្រុញស្នើសុំឱ្យទីវត្តអារាម គប្បីរៀបចំឱ្យមានរបៀបរៀបរយ មានអនាម័យបរិស្ថានល្អ និងបន្តអនុវត្តវិធានការសុខាភិបាល «៣ការពារ និង៣កុំ» ឱ្យបានខ្ជាប់ខ្ជួន ជាពិសេសសូមចូលរួមទទួលយកវ៉ាក់សាំងកាពារជំងឺកូវីដ-១៩ឲ្យបានគ្រប់ដូសនីមួយៗ បើទោះបីជាបច្ចុប្បន្ននេះកម្ពុជាគ្រប់គ្រងបានល្អចំពោះជំងឺកូវីដ១៩ តាមរយៈការប្រឹងប្រែងចាក់វ៉ាក់សាំងជូនប្រជាពលរដ្ឋពីប្រមុខរាជរដ្ឋាភិបាលកម្ពុជាក៏ដោយ និងត្រូវតែបន្តរួមគ្នាពង្រឹងការប្រតិបត្តិធម៌វិន័យ និងចូលរួមលើកស្ទួយថែរក្សា ព្រះពុទ្ធសាសនាឱ្យបានល្អប្រសើរ ស្របទៅនឹងការលើកស្ទួយរបស់រាជរដ្ឋាភិបាលកម្ពុជា បានចាត់ទុកពុទ្ធសាសនា ជាសាសនារបស់រដ្ឋ។
សូមបញ្ជាក់ថា បច្ច័យដែលប្រគេនជូនព្រះសង្ឃទាំង១០វត្ត ក្នុង១វត្តទទួលបានបច្ច័យ ៦០ម៉ឺនរៀលផងដែរ ក្រៅពីទៀនចំណាំព្រះវស្សា និងគ្រឿងបរិក្ខាមួយចំនួន ៕
ប្រភព៖ រដ្ឋបាលខេត្តក្រចេះ