នាព្រឹកថ្ងៃពុធទី១៣ ខែកក្កដា ឆ្នាំ២០២២នេះ ឯកឧត្តម ជុំ ហាត ប្រធានក្រុមប្រឹក្សាខេត្តនិង ឯកឧត្តម ម៉ែន វិបុល អភិបាលនៃគណៈអភិបាលខេត្តស្វាយរៀងបានអញ្ជើញចូលរួមជាមួយលោក ជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានក្រុមការងាររាជរដ្ឋាភិបាលចុះមូលដ្ឋាននៅខេត្តស្វាយរៀងក្នុងពិធីប្រគេនទៀនព្រះវស្សាប្រគេនព្រះសង្ឃគង់ចាំព្រះវស្សាអស់ត្រីមាសចំនួន៩វត្ត នៅខេត្តស្វាយរៀងដែលរៀបចំឡើងនៅវត្តព្រៃឆ្លាក់ ស្ថិតនៅសង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង។
ពិធីនេះក៏មានការអញ្ជើញចូលរួមពីឯកឧត្ដម លោកជំទាវសមាជិកព្រឹទ្ធសភា សមាជិករដ្ឋសភា ក្រុមការងាររាជរដ្ឋាភិបាលចុះមូលដ្ឋាន ប្រធានមន្ទីរ-អង្គភាពនានាក្នុងខេត្ត ក្រុមប្រឹក្សាក្រុង គណៈអភិបាលក្រុង យាយជី តាជី ព្រមទាំងបងប្អូនប្រជាពលដ្ឋចំណុះជើងវត្ត ។
មានប្រសាសន៍ទៅកាន់ពិធីនេះលោកជំទាវកិត្តិសង្គហបណ្ឌិត បានបញ្ជាក់ថា តាមនិយាមជាពុទ្ធទំនៀមរៀងដរាបមក ការចូលព្រះវស្សាមាននៅគ្រប់សម័យកាលនៃព្រះពុទ្ធអង្គទាំងអស់។ដូច្នេះទំនៀមចូលព្រះវស្សានេះ មានជាប់រហូតមកដល់បច្ចុប្បន្នក្នុងមួយឆ្នាំធ្វើតែម្ដងតាមពុទ្ធបញ្ញត្តិ។កាលណាព្រះភិក្ខុសង្ឃ បានគង់ចាំវស្សាគ្រប់៣ខែ ហើយមានសិទ្ធិទទួលកឋិនអំពីពុទ្ធបរិស័ទដែលបាននាំយកមកប្រគេនពីគ្រប់ទិសទី។ ហេតុនេះការចូលព្រះស្សានៃភិក្ខុសង្ឃ ក្នុងន័យការពារទប់ស្កាត់ការនិមន្តទៅកាន់ទីផ្សេងៗ នាំឱ្យមានការពោលតិះដៀលពីជនដទៃ ក្នុងរដូវខែមានភ្លៀងធ្លាក់ជោគជាំការហាមប្រាមនេះព្រោះថាសម័យបុរាណ ព្រះសង្ឃពុំមានវត្តអារាមដូចបច្ចុប្បន្នកាលនេះទេច្រើនតែទៅគង់ក្នុងព្រៃជ្រៅធ្វើសំណាក់ធម៌។
លោជំទាវកកិត្តិសង្គហបណ្ឌិត បានបន្តទៀតថា ពិធីនេះអាចប្រព្រឹត្តទៅបាន ដោយសាតែប្រទេសជាតិមានសុខសន្តិភាពពេញលេញ ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន បានដឹកនាំប្រទេសឲ្យមានការអភិវឌ្ឍ និងមានការរីកចម្រើនលើគ្រប់វិស័យ ក្នុងនោះវិស័យព្រះពុទ្ធសាសនាក៏មានការរីកចម្រើនគួរឲ្យកត់សម្គាល់ផងដែរ។ចំណែកឯទឹកចិត្តសទ្ធាជ្រះថ្លានាថ្ងៃនេះបានកើតឡើងចេញពីការរួមសាមគ្គីពីសំណាក់ឯកឧត្តម លោកជំទាវ ឧកញ៉ា លោក លោកស្រី ទាំងអស់គ្នានេះគឺបានចូលរួមចំណែកយ៉ាងសំខាន់ជាមួយរាជរដ្ឋាភិបាលក្នុងការលើកស្ទួយវិស័យព្រះពុទ្ធសាសនានៅកម្ពុជាឲ្យកាន់តែរីកចម្រើនបន្ថែមទៀត ។
ទេយ្យទានដែលបានវេរ និងប្រគេនដល់ព្រះសង្ឃដល់ទាំង៩វត្តក្នុងថ្ងៃនេះរួមមាន៖ បច្ច័យ ២លានរៀលទៀនធំ១គូស្លាដក់១អង្ករ៧៥គីឡូក្រាមទឹកក្រូច ៥កេស ទឹកសុទ្ធ៥កេស ទឹកត្រី២យួរ ទឹកស៊ីអីវ ២យួរ ត្រីខកំប៉ុង១កេសធំ ទឹកដោះគោ១០កំប៉ុង ស្ករស៥គីឡូក្រាម ប៊ីចេង២គីឡូក្រាម ទៀនតូច២គីឡូក្រាម ធូប២ដុំ ខ្ទឹមស២គីឡូក្រាម តែ៦កញ្ចប់ អំបិល២គីឡូក្រាម សៀង២គីឡូក្រាម ឆៃប៉ូវ២គីឡូក្រាម ម៉ាស ១កេស ជែល១កេស នំអន្សម៥ ផ្លែឈើ១កន្ត្រក បច្ច័យ២លានរៀល ព្រះសង្ឃ៤៤អង្គ ក្នុង១អង្គ បច្ច័យ៤ម៉ឺនរៀល៕
ប្រភព៖ រដ្ឋបាលខេត្តស្វាយរៀង