នៅព្រឹកថ្ងៃសៅរ៍ ទី០៩ ខែកក្កដា ឆ្នាំ២០២២នេះ ឯកឧត្តម ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែង និងឯកឧត្តម ឈាង ឡាក់ ប្រធានក្រុមប្រឹក្សាខេត្ត បានដឹកនាំមន្រ្តីរាជការ នាំយកគ្រាប់ត្នោតដាំតាមបណ្តោយខ្សែបន្ទាត់ព្រំដែនកម្ពុជា-ឡាវ ក្នុងគោលបំណងរក្សាបាននូវបូរណៈភាពទឹកដី ជាប្រយោជន៍សម្រាប់កូនចៅជំនាន់បានដឹង បានស្គាល់ និងចេះស្រឡាញ់អ្វីដែលជាអត្តសញ្ញាណជាតិ។
លោក បញ្ជាក់ថា÷ គ្រាប់ត្មោតដាំតាមបណ្តោយសងខាងផ្លូវក្រវ៉ាត់ព្រំដែនកម្ពុជា-ឡាវ មានចំនួន ០៦លើក ដោយលើកទី១ ឆ្នាំ២០១៦ ដាំគ្រាប់ពូជត្នោត ១១.៥០០គ្រាប់, លើកទី២ ឆ្នាំ២០១៧ ចំនួន១០.០០០ គ្រាប់, លើកទី៣ ឆ្នាំ២០១៨ មានគ្រាប់ពូជត្នោត ២៥.០០០គ្រាប់, លើកទី៤ ឆ្នាំ២០១៩ មានចំនួន ៣០.០០០ គ្រាប់ លើកទី៥មានចំនួន ១០០.០០០គ្រាប់ និងលើកទី៦នេះ មានគ្រាប់ពូជត្នោតចំនួន ៣០.០០០ គ្រាប់។
ឯកឧត្ត ស្វាយ សំអ៊ាង បានលើកឡើងថា ដើមត្នោតជារុក្ខជាតិដែលផ្តល់នូវគុណសម្បត្តិច្រើនយ៉ាងដល់ ប្រជាជនខ្មែរតាំងពីសម័យបុរាណកាលមក និងជានិមិត្តសញ្ញាតំណាងអត្តសញ្ញាណជាតិដួងព្រលឹងជាតិ ដែលប្រជាជនខ្មែរសម្គាល់ភាពទឹកដីរបស់ខ្លួនពីបុរាណកាលរហូតមកដល់បច្ចុប្បន្ន។
សូមបញ្ជាក់ថាការដាំគ្រាប់ពូជត្នោតលើកទី០៦នេះ ត្រូវបានរដ្ឋបាលខេត្តស្ទឹងត្រែងសម្រេចដាំ តាមបណ្តោយសងខាងផ្លូវក្រវ៉ាត់ព្រំដែនកម្ពុជា-ឡាវ ចាប់ពីចំណុចបង្គោលព្រំដែនលេខ0៤២ ទៅបង្គោលព្រំដែនលេខ០៤៩៕
ប្រភព៖ រដ្ឋបាលខេត្តស្ទឹងត្រែង