ខេត្តកំពង់ឆ្នាំង៖ កាលថ្ងៃព្រហស្បតិ៍ ៣រោច ខែភទ្របទ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី២៧ ខែកញ្ញា ឆ្នាំ២០១៨ ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង និងលោកជំទាវ បានអញ្ជើញជាអធិបតីក្នុងពិធីសែនក្រុងពាលីសុំសេចក្តីសុខសប្បាយ ដែលអាជ្ញាធរខេត្តត្រៀមរៀបចំគម្រោងធ្វើការបំលាស់ទីផ្ទះបណ្តែតទឹក ឡើងមកនៅលើដីគោកវិញក្នុងពេលឆាប់ៗនេះ។
ថ្លែងក្នុងឱកាសនោះ ឯកឧត្តមឈួរ ច័ន្ទឌឿន បានមានប្រសាសន៍ថា៖ផែនការគ្រោងនឹងបម្លាស់ទីផ្ទះបណ្ដែតទឹកនេះ ធ្វើឡើងដើម្បីធានាបាននូវបរិស្ថាន និងសោភ័ណភាពនៅតាមដងទន្លេនៃភូមិសាស្រ្តខេត្តកំពង់ឆ្នាំង។ ឯកឧត្តមក៏បានមានប្រសាសន៍សំណេះសំណាលបន្ដទៀតថា នៅក្នុងរយៈពេលដ៍ខ្លីខាងមុខនេះ ពលរដ្ឋដែលរស់នៅផ្ទះបណ្តែតទឹកនៅតាម ដងទន្លេក្នុងភូមិសាស្រ្តរបស់ខេត្តកំពង់ឆ្នាំង និងត្រូវបំលាស់ទីមកនៅលើគោកវិញ ទៅតាមទីតាំងដែលអាជ្ញាធរបានកំណត់ ដូច្នេះក្នុងពេលដែលទឹកបានឡើងនេះ គឺពលរដ្ឋដែលរស់នៅលើផ្ទះបណ្តែតទឹកត្រូវបានអាជ្ញាធរធ្វើការផ្សព្វផ្សាយរួចហើយ អោយគាត់ត្រៀមលក្ខណៈធ្វើការបំលាស់ទីជាបណ្តើរៗ ទៅរកទីតាំងដែលអាជ្ញាធរបានកំណត់។ គូសបញ្ជាក់ដែរថា នៅក្នុងពិធីនោះដែរក៏មានការអញ្ជើញចូលរួមពីលោក លោកស្រីប្រធានមន្ទីរ អង្គភាពជុំវិញខេត្ត លោកអភិបាល អភិបាលរងខេត្ត ក្រុង/ស្រុក មន្ត្រីរាជការ និងប្រជាពលរដ្ឋចូលរួមផងដែរ ៕