នារសៀលថ្ងៃទី១០ ខែកក្កដា ឆ្នាំ២០២២ នៅសាលាសង្កាត់ដើមមៀន ឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានអញ្ជើញជាអធិបតីក្នុងពិធីប្រកាសសុពលភាពសមាជិកក្រុមប្រឹក្សាដើមមៀន អាណត្តិទី៥ នៃក្រុងតាខ្មៅ ខេត្តកណ្តាល។
នាឱកាសនោះ ឯកឧត្ដម គង់ សោភ័ណ្ឌ បានថ្លែងថា ក្រុមប្រឹក្សាសង្កាត់ដើមមៀនថ្មី ដែលបានទទួលនូវការស្រឡាញ់ពេញចិត្ត និងការគាំទ្រពីសំណាក់ប្រជាពលរដ្ឋ តាមរយៈការបោះឆ្នោត កាលពីថ្ងៃអាទិត្យ ទី០៥ ខែមិថុនា ឆ្នាំ ២០២២ កន្លងមកនេះ ត្រូវយកចិត្តទុកដាក់ផ្ដល់សេវាសាធារណៈជូនប្រជាពលរដ្ឋ និងបន្តខិតខំថែរក្សានូវសុខសុវត្ថិភាព សណ្ដាប់ធ្នាប់សាធារណៈ ឱ្យមានប្រសិទ្ធភាពខ្ពស់ក្នុងមូលដ្ឋានរបស់ខ្លួន។
ឯកឧត្តមអភិបាលខេត្ត បន្តថា ដើម្បីឆ្លើយតបទៅនឹងការគាំទ្ររបស់ប្រជាពលរដ្ឋ សមាជិកក្រុមប្រឹក្សាសង្កាត់ទាំងអស់ ត្រូវខិតខំផ្តល់សេវាសាធារណៈនានាជូនប្រជាពលរដ្ឋក្នុងមូលដ្ឋានរបស់ខ្លួនឱ្យបានល្អប្រសើរប្រកបដោយ ក្រមសីលធម៌វិជ្ជាជីវៈ និងកែលម្អឥរិយាបថក្នុងការប្រាស្រ័យទាក់ទងជាមួយប្រជាពលរដ្ឋ ដោយតម្លាភាព គណនេយ្យភាព និងយុត្តិធម៌ ដោយមិនត្រូវមានការរើសអើង ការបែងចែកបក្សពួក គ្រួសារ និយម និងនិន្នាការនយោបាយ ដើម្បីបង្កើនជំនឿទុកចិត្ត និងការគាំទ្រពីប្រជាពលរដ្ឋ ព្រមទាំងត្រូវអនុវត្ដឱ្យស្របតាមច្បាប់ និងលិខិតបទដ្ឋានគតិយុត្តកំណត់។
ទន្ទឹមនឹងនោះ ក្រុមប្រឹក្សាសង្កាត់ដើមមៀន អាណត្តិថ្មី ត្រូវសហការ និងប្រមូលរាល់កម្លាំងមហាជន ប្រជាជនក្នុងសង្កាត់ ដើម្បីអនុវត្តឱ្យសម្រេចបានជោគជ័យនូវរាល់គោលនយោបាយនានារបស់រាជរដ្ឋាភិបាល ពិសេសជំរុញការចូលរួមអនុវត្តគោលនយោបាយ «ភូមិ ឃុំ សង្កាត់មានសុវត្ថិភាព»របស់រាជរដ្ឋាភិបាល។
សូមបញ្ជាក់ផងដែរថា តាមប្រកាសរបស់ក្រសួងមហាផ្ទៃ លេខ៣០៨៨ ប្រ ក ស្ដីពីការទទួលស្គាល់សមាសភាពប្រធានក្រុមប្រឹក្សាសង្កាត់ ចៅសង្កាត់ ចៅសង្កាត់រង និងសមាជិកក្រុមប្រឹក្សាសង្កាត់ នៃសង្កាត់ដើមៀន ក្រុងតាខ្មៅ ខេត្តកណ្តាល ទទួលស្គាល់សមាសភាពជាប្រធានក្រុមប្រឹក្សាសង្កាត់ និងសមាជិកក្រុមប្រឹក្សាសង្កាត់ដើមមៀន មានដូចជា៖ ១-លោក ឯក សំណាង ជាប្រធានក្រុមប្រឹក្សាសង្កាត់ ,២-លោក ភី រស្មី ជាសមាជិកក្រុមប្រឹក្សាសង្កាត់ ,៣-លោក គង់ ណារិទ្ធ ជាសមាជិកក្រុមប្រឹក្សាសង្កាត់ ,៤-លោក ស៊ូ សេន ជាសមាជិកក្រុមប្រឹក្សាសង្កាត់ ,៥-លោកសី្រ សួន ម៉ារឌី ជាសមាជិកក្រុមប្រឹក្សាសង្កាត់ ,៦-លោក ឡឹក កុសល ជាសមាជិកក្រុមប្រឹក្សាសង្កាត់ ,៧-លោកស្រី អង់ មុំ ជាសមាជិកក្រុមប្រឹក្សាសង្កាត់ ,៨-លោក ជុក សារឿន ជាសមាជិកក្រុមប្រឹក្សាសង្កាត់ ,៩-លោក សេន ស៊ុបផាអ៊ី ជាសមាជិកក្រុមប្រឹក្សាសង្កាត់៕
ប្រភព៖ រដ្ឋបាលខេត្តកណ្ដាល