ព្រឹកថ្ងៃអង្គារ ០១រោច ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៥ ខែកញ្ញា ឆ្នាំ២០១៨នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង និងឯកឧត្ដម ជុំ ហាត ប្រធានក្រុមប្រឹក្សាខេត្ត អញ្ជើញចូលរួមក្នុងពិធីសម្ពោធគម្រោងព្យាបាលភ្នែកឡើងបាយ និងភ្នែកដុះកន្ទុយថ្លែនដោយឥតគិតថ្លៃរបស់ក្រុម គ្រូពេទ្យស្ម័គ្រចិត្តអង្គការខេមបូឌាវីសិន (អូស្ត្រាលី) ក្រោមអធិបតីភាពលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច នាបរិវេណមន្ទីរពេទ្យខេត្ត ក្រុងស្វាយរៀង។

គម្រោងព្យាបាលក្រុមគ្រូពេទ្យស្ម័គ្រចិត្តអង្គការខេមបូឌាវីសិន (អូស្ត្រាលី) នឹងធ្វើការព្យាបាលភ្នែកឡើងបាយ និងភ្នែកដុះកន្ទុយថ្លែន, ជួយពិនិត្យសុខភាពសម្រាប់អ្នកគ ថ្លង់ នៅក្នុងខេត្តស្វាយរៀង ដោយឥតគិតថ្លៃ ចាប់ពីថ្ងៃទី២៤ ដល់ថ្ងៃទី២៩ ខែកញ្ញា ឆ្នាំ២០១៨ នៅក្នុងបរិវេណមន្ទីរពេទ្យខេត្តស្វាយរៀង៕