កាលពីរសៀលថ្ងៃទី ២៣ កញ្ញា ២០១៨ ក្នុងពិធីសំណេះសំណាល​ និងប្រគល់ រង្វាន់លើកទឹកចិត្តជូនសិស្សឆ្នើម ក្នុងខេត្តក្រចេះ​ ដែលរៀបចំដោយ ឯកឧត្តម វ៉ា​ ថន​ អភិបាលខេត្តក្រចេះ​ និងមានការចូលរួមក្រោមអធិបតីភាព​ ឯកឧត្តម កិត្តិបណ្ឌិត ពេជ្រ ប៊ុនធិន​ រដ្ឋមន្រ្តីក្រសួងមុខងារសាធារណៈ​ រួមទាំងថ្នាក់ដឹកនាំ អង្គភាពជុំវិញខេត្ត និងមាតាបិតាសិស្សយ៉ាងច្រើនកុះករ​ ដែលប្រព្រឹត្តទៅនាសាលមហោស្របខេត្តក្រចេះ។ ​

យោងតាមរបាយការណ៍របស់មន្ទីរអប់រំខេត្ត បានបញ្ជាក់ពីលទ្ធផលនៃការប្រឡង សញ្ញាប័ត្រមធ្យមសិក្សាទុតិយភូមិ ឆ្នាំ ២០១៨ នេះ​ អោយដឹងថា៖ បេក្ខជនមានឈ្មោះក្នុងបញ្ជីប្រឡងចំនួន ១,៩៤០នាក់ ស្រី ១,០៤០ នាក់ មានមណ្ឌលប្រឡងចំនួន ៤ និងមានបន្ទប់ប្រឡង ៧៩ បន្ទប់ ហើយបេក្ខជនដែលមកប្រឡងចំនួន ១,៩០២ នាក់ ស្រី ១,០១៨នាក់ ប្រឡងជាប់ចំនួន ១,០០០នាក់ ស្រី ៥៨២ នាក់ ស្មើនឹង ៥២.៦៧% ស្រី ៥៧.១៧% កើនឡើង ៧.៩៦% ស្រី ៥.៧២% ធៀបនឹងឆ្នាំ ២០១៧ ។ក្នុងនោះនិទ្ទេសA ៧នាក់ ស្រី៣ B= ៣៨ នាក់ ស្រី ២១នាក់ C= ៧៥ នាក់ ស្រី ៤៦នាក់ D= ១៤៧ នាក់ ស្រី ៩៨ នាក់ និងE= ៧៣៣ នាក់ ស្រី ៤១៤នាក់។

​ឯកឧត្តម​ កិត្តិបណ្ឌិត​ ពេជ្រ​ ប៊ុនធិន​ មានប្រសាសន៍ថា លទ្ធផលដែលក្មួយ ជាសិស្សពូកែប្រចាំសាលាទូទាំងខេត្ត ក្រុង-ស្រុក ទាំងអស់ ទទួលបាន នៅពេលនេះ គឺជាការបំផុសឱ្យគ្រួសារសហគមន៍ និងសាលារៀន ព្រមទាំងលោកគ្រូអ្នកគ្រូ អោយមាន ស្មារតី​ និងទំនួលខុសត្រូវបន្តអប់រំ,​ ការព្យាយាមផ្តល់ចំណេះដឹង ចំណេះធ្វើ សំដៅបង្កើននូវបរិមាណសិស្សឆ្នើម ឱ្យបានកាន់តែច្រើនថែមទៀត។ ឯកឧត្តមបន្តថា​ គោលនយោបាយរបស់រាជរដ្ឋាភិបាលកម្ពុជា ដែលមាន​ សម្តេច អគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី បានខិតខំយកចិត្តទុកដាក់ខ្ពស់ ក្នុងកំណែទម្រង់ឲ្យស៊ី ជម្រៅ ទៅលើវិស័យអប់រំ និងបានចាត់ទុកវិស័យអប់រំគឺជាវិស័យអាទិភាព ក្នុងការបណ្ដុះបណ្តាលចំណេះដឹងដល់ មនុស្សគ្រប់ជំនាន់ ឲ្យទទួលបាននូវចំណេះដឹង និងជំនាញប្រកបដោយគុណភាព និងប្រសិទ្ធភាពយ៉ាងពិត ប្រាកដ ។ ឯកឧត្តមបន្ថែមថា ក្មួយៗសិស្សានុសិស្សទាំងអស់មិនត្រូវស្កប់ស្គាល់នូវអ្វីដែល ជាជ័យជម្នះពេលនេះ​ហើយ បញ្ឈប់ ឬបោះបង់ចោលនូវជ័យជម្នះខាងមុខនោះទេ ត្រូវរក្សាការព្យាយាមនេះទុកក្នុងចិត្តជានិច្ច​។ ឯកឧត្តមបាន ផ្តាំផ្ញើផងដែរថា ក្មួយត្រូវជៀសវាងឲ្យឆ្ងាយពីគ្រឿងញៀន​ និងខិតខំសិក្សាស្រាវជ្រាវបន្ថែមដោយខ្លួនឯង ហើយ ត្រូវមានទស្សនៈវិស័យឱ្យវែងឆ្លាយ និងត្រូវមានគោលដៅសម្រាប់អនាគតខ្លួនច្បាស់លាស់​។ ដោយឡែកសម្រាប់ អ្នកដែលមិនបានជាប់ ជ័យលាភីឆ្នាំនេះមិនត្រូវបោះបង់ការសិក្សាឡើយ ត្រូវបន្តការសិក្សាដើម្បីប្រឡង ឆ្នាំក្រោយៗ ទៀត ឬត្រូវមានជំនាញឯកទេសផ្សេងៗ​ តាមរយះសិក្សាជំនាញ បណ្តុះបណ្តាលវិជ្ជាជីវៈ។ ជាចុងបញ្ចប់​ ឯកឧត្តម​ កិតិ្តបណ្ឌិត​ បានប្រកល់លិខិត សរសើរ រួមនិងថវិការដល់សិស្សជ័យលាភីនិទ្ទេសA ចំនួន ៧ នាក់ ក្នុងម្នាក់ៗ ទទួលបាន៦០០ ដុល្លា និទ្ទេសB ៣៨នាក់ ថវិការ ៧០ម៉ឺនរៀល និងនិទ្ទេសC ៧៥នាក់ ថវិការ ៥០ម៉ឺនរៀល និងវិទ្យាល័យក្នុងខេត្តទាំងអស់ ក្នុងវិទ្យាល័យ ១ទទួលបានថវិការ ៤០ម៉ឺនរៀលផងដែរ៕