តាកែវ ៖ នៅថ្ងៃពុធ ទី១៥ ខែមិថុនា ឆ្នាំ២០២២ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ បានអញ្ជើញចូលរួមអបអរសាទរទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៥ ឆ្នាំ២០២២ ក្រោមប្រធានបទ « TVET បង្កើនផលិតភាពការងារ និងភាពប្រកួតប្រជែងខ្ពស់» ដែលបានប្រារព្ធធ្វើឡើង នៅវិទ្យាស្ថានពហុបច្ចេកទេសភូមិភាគតេជោសែនតាកែវ។

គួរបញ្ជាក់ថា ពិធីនេះក៏មានការអញ្ជើញចូលរួម ដូចជា ៖ អភិបាលរងខេត្តតាកែវ ស្នងការនគរបាលខេត្ត មេបញ្ជាការតំបន់សឹករងខេត្ត មេបញ្ជាការកងរាជអាវុធហត្ថខេត្ត លោក លោកស្រី ប្រធានមន្ទីរអង្គភាពជុំវិញខេត្ត លោក លោកស្រី អភិបាល អភិបាលរងក្រុង ស្រុក លោកគ្រូ អ្នកគ្រូ សិស្សានុសិស្ស មកវិទ្យាល័យជាស៊ីមតាកែវ និងនិស្សិតវិទ្យាស្ថានជាច្រើនកុះករ ផងដែរ។

មានប្រសាសន៍ចូលរួមនាឱកាសនោះដែរ ឯកឧត្តម អ៊ូច ភា បានថ្លែងថា ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៥ ឆ្នាំ២០២២ គឺជាការបង្ហាញឱ្យឃើញអំពីការខិតខំប្រឹងប្រែងរួមគ្នាជាចលនាជាតិមួយ ដើម្បីពង្រីកការយល់ដឹងអំពីតួនាទី និងសារសំខាន់ចាំបាច់របស់ការអប់រំបណ្តុះបណ្តាលបច្ចេកទេស និងវិជ្ជាជីវៈ ទាំងថ្នាក់ជាតិ និងថ្នាក់ក្រោមជាតិ ក្នុងការផ្តល់ការសិក្សាពេញមួយជីវិត ដើម្បីអភិវឌ្ឍកម្លាំងពលកម្មជំនាញ និងជាការបង្ហាញឱ្យឃើញជាក់ស្តែងថា TVET ពិតជាអាចធ្វើឱ្យផលិតភាពការងារកើន និងបង្កើនភាពប្រកួតប្រជែងខ្ពស់ ក្នុងទីផ្សារការងារទាំងក្នុងស្រុក និងក្រៅស្រុក៕

ប្រភព៖ រដ្ឋបាលខេត្តតាកែវ