ព្រឹកអង្គារ ១០កើត ខែស្រាពណ៍ ឆ្នាំច សំរិទ្ធស័ក ព.ស២៥៦២ ត្រូវនឹងថ្ងៃទី២១ ខែសីហា ឆ្នាំ២០១៨នេះ ឯកឧត្តម វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានអញ្ជើញបន្ដបើកកញ្ចប់វិញ្ញាសារប្រឡងសញ្ញាបត្រមធ្យមសិក្សាទុតិយភូមិ នាសម័យប្រឡង២០ សីហា ឆ្នាំ២០១៨ នៅមណ្ឌលវិឡាល័យចំបក់ ។ ក្នុងឱកាសនោះ ឯកឧត្តម វ៉ី សំណាង បានលើកទឹកចិត្តដល់ក្មួយៗសិស្សានុសិស្សទាំងអស់ ត្រូវខិតខំប្រឹងប្រែងឲ្យអស់ពីសមត្ថភាព ធ្វើឲ្យបានរួចរាល់លើគ្រប់វិញ្ញាសារ ដោយត្រូវគោរពឲ្យបានខ្ជាប់ខ្ជួន នូវបទប្បញ្ញត្តិ និងបទបញ្ជាផ្ទៃក្នុងនៃការប្រលង ។ ជាមួយនេះ ឯកឧត្តម ក៏បានជូនពរដល់សិស្សានុសិស្សទាំងអស់ឲ្យទទួលបានលទ្ធផលជោគជ័យ និងទទួលបាននិទ្ទេសល្អគ្រប់ៗគ្នាក្នុងសម័យប្រលងឆ្នាំសិក្សា ២០១៨-២០១៩នេះ ហើយរដ្ឋបាលខេត្តនៅតែបន្ត និងត្រៀមរង្វាន់សម្រាប់ផ្ដល់ជូន សិស្សានុសិស្សដែលទទួលបាននិទ្ទេសល្អប្រសើរផងដែរ ។ សូមបញ្ជាក់ផងដែរថា សម័យប្រឡង២០១៨-២០១៩ មានបេក្ខជនបានដាក់ពាក្យប្រឡងសរុប៤៤២៦នាក់ (ស្រី ២១៣៩នាក់) ចែកចេញជា១០មណ្ឌល មណ្ឌលថ្នាក់វិទ្យាសាស្ត្រមានចំនួន០២ ចំនួនបន្ទប់ ៥៣បន្ទប់ មណ្ឌលថ្នាក់វិទ្យាសាស្ត្រសង្គមមាន ០៨មណ្ឌល ស្មើ១២៨បន្ទប់។ ក្នុងចំណោមសិស្សដាក់ពាក្យប្រឡងមាន បេក្ខជនចំណេះដឹងទូទៅចំនួន៣៨៩៧នាក់ បេក្ខជនស្វៃរិនចំនួន ៤០៤នាក់ (ស្រី១៧៣នាក់) បេក្ខជនបំពេញវិជ្ជាចំនួន ៤៥នាក់ (ស្រី២២នាក់) បេក្ខជនស្វៃរិនបំពេញវិជ្ជាចំនួន ១៣៧នាក់ (ស្រី៥៩នាក់) បេក្ខជនជ្រើសភាសាអង់គ្លេសមានចំនួន ៤៤០០នាក់ (ស្រី២១២៥នាក់) និងបេក្ខជនជ្រើសភាសាបារាំងចំនួន២៦នាក់ (ស្រី១៤នាក់)៕