នៅថ្ងៃអង្គារ ៣កើត ខែស្រាពណ៍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៤ ខែសីហា ឆ្នាំ២០១៨ សម្តេចចៅហ្វាវាំងង វរវៀងជ័យ អធិបតីស្រឹង្គារ គង់ សំអុល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជាវាំង បានយកអំណោយរបស់ព្រះករុណាព្រះបាទសម្តេចបរាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការ:ដ៍ខ្ពង់ខ្ពស់បំផុត និងសម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនិនាថ សីហនុ នៃព្រះរាជាណាចក្រកម្ពុជា ជាទីគោរពសក្ការ:ដ៍ខ្ពង់ខ្ពស់បំផុសបានប្រោសប្រទានដល់ប្រជារាស្ត្រទទួលរងគ្រោះដោយទឹកជំនន់ចំនួន ៦៦៧ គ្រួសារ នៅភូមិថ្មី ភូមិអង្គរមានយស ក្នុងឃុំព្រែកអន្ទះ និងមួយផ្នែកនៃភូមិជ្រៃគ្រហ៊ឹម ឃុំកំពង់ឬស្សី ស្រុកពោធិរៀង ខេត្តព្រៃវែង ។ ឯកឧត្តម ជា សុមេធី អភិបាលខេត្តព្រៃវែង និងឯកឧត្តម ប្រធានក្រុម ប្រឹក្សាខេត្ត ព្រមទាំងមន្ត្រីរាជការ កងកម្លាំងប្រដាប់អាវុធ ព្រះសង្ឃ និងប្រជាពលរដ្ឋ ក្នុងខេត្តព្រៃវែងទាំងអស់ សូមថ្លែងអំណរព្រះរាជគុណដ៏ខ្ពង់ខ្ពស់ថ្វាយចំពោះ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ដែលបានប្រោសព្រះរាជទានសម្តេចចៅហ្វាវាំងវរវៀងជ័យ អធិបតីស្រីង្ការ គង់ សំអុល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះរាជវាំង តំណាងដ៏ខ្ពង់ខ្ពស់របស់ព្រះអង្គ នាំយកព្រះរាជអំណោយមកចែកជូនដល់បងប្អូនប្រជារាស្រ្តដែលទទួលរងគ្រោះដោយទឹកជំនន់ទាំង ៦៦៧គ្រួសារ នៅភូមិថ្មី ភូមិអង្គរមានយស ក្នុងឃុំព្រែកអន្ទះ និងមួយផ្នែកនៃភូមិជ្រៃគ្រហ៊ឹម ឃុំកំពង់ឬស្សី ស្រុកពោធិរៀង ខេត្តព្រៃវែង ។ ជាថ្មីម្តងទៀត ឯកឧត្តម អភិបាលខេត្ត និងប្រជាពលរដ្ឋ ទូទាំងខេត្តព្រៃវែង សូមក្រាបបង្គំ ទូលថ្វាយព្រះពរ ចំពោះព្រះករុណាជាអម្ចាស់ជីវិតលើត្បូង សូមព្រះអង្គមានព្រះសុខភាពល្អបរិបូណ៌ព្រះជន្ម យឺនយូរ ដើម្បី គង់ប្រថាប់ជាម្លប់ដ៏ត្រជាក់ដល់កូនចៅ ចៅតួតរបស់ព្រះអង្គជានិច្ចនិរន្តរ៍តទៅ។
