នាព្រឹកថ្ងៃច័ន្ទ ២កើត ខែស្រាពណ៍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៣ សីហា ២០១៨នេះ ឯកឧត្តម គួច ចំរើន អភិបាលខេត្តកំពង់ចាម ព្រមទាំងក្រុមការងារ បានអញ្ជើញ ធ្វើដំណើរតាមទូក ចុះសំណេះសំណាលសួរសុខទុក្ខ និងនាំយកអំណោយជាស្បៀងអាហារ គ្រឿងឧបភោគ បរិភោគ និងថវិកា ទៅឧបត្ថម្ភដល់ប្រជាពលរដ្ឋ ចំនួន ៤៨៦គ្រួសារ នៅភូមិ៦ ភូមិ១០ និង ភូមិ១១ ស្ថិតក្នុងឃុំកោះសូទិន ស្រុកកោះសូទិន ខេត្តកំពង់ចាម។ ឯកឧត្តម គួច ចំរើន អភិបាលខេត្តកំពង់ចាម បានពាំនាំ ការសួរសុខទុក្ខរបស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដោយស្នើ ដល់អាជ្ញាធរត្រូវតែជួយសង្គ្រោះពលរដ្ឋគ្រប់ពេលវេលា ដោយមិនប្រកាន់ពូជសាសន៍ពណ៌សំបុលអ្វីឡើយ គឺ ដើម្បីជួយសម្រាលនូវទុក្ខលំបាករបស់ពួកគាត់ រហូតដល់ ពេលទឹកស្រកទៅវិញ គឺត្រូវបន្ដផ្គត់ផ្ដង់ ឬផ្ដល់នូវស្បៀង សម្ភារប្រើប្រាស់ ជូនដល់បងប្អូនប្រជាពលរដ្ឋយើង ឲ្យ បានគ្រប់គ្នា ព្រោះថា ផលដំណាំមួយចំនួន និងលំនៅ ឋានរបស់ពួកគាត់ ក៏ត្រូវបានខូតខាតអស់ផងដែរ។ ក្នុងឱកាសនោះដែរ ឯកឧត្តមក៏បានផ្តាំដល់បងប្អូន ប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់ ពីសុវត្ថិភាពផ្ទាល់ខ្លួន និងក្រុមគ្រួសារ ដោយរដូវនេះ មានភ្លៀងធ្លាក់លាយឡំជាមួយខ្យល់ និងផ្គររន្ទៈ ដែល ងាយបង្កគ្រោះថ្នាក់ ហើយបើបងប្អូនមានកើតបញ្ហាអ្វីកើត ឡើងក្នុងគ្រួសារត្រូវរាយការណ៍អាជ្ញាធរមូលដ្ឋាន ដែលនៅជិតកៀកជាមួយបងប្អូនផ្ទាល់ ដើម្បីអោយក្រុមការងារ ចុះជួយដល់បងប្អូនឆាប់រហ័ស និងទាន់ពេលវេលា៕
