ក្រុមព័ត៌មានទាន់ហេតុការណ៍ នៃអគ្គស្នងការដ្ឋាននគរបាលជាតិ បានរៀបចំកិច្ចប្រជុំប្រចាំត្រីមាសទី១ ឆ្នាំ២០១៩ ស្តីពីលទ្ធផលកិច្ចប្រតិបត្តិការរបស់ក្រុមព័ត៌មានទាន់ហេតុការណ៍ (Hotline) ជាមួយជនបរទេសនៅព្រះរាជាណាចក្រកម្ពុជា (គិតចាប់ពីថ្ងៃទី២០ ខែធ្នូ ឆ្នាំ២០១៨ ដល់ថ្ងៃទី១៩ ខែមីនា ឆ្នាំ២០១៩) ក្រោមអធិបតីភាព ឯកឧត្តម នាយឧត្តមសេនីយ៍ ថោង លីម អគ្គស្នងការរង នៃអគ្គស្នងការដ្ឋាននគរបាលជាតិ នៅថ្ងៃអង្គារ ៤កើត ខែពិសាខ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី៧ ខែឧសភា ឆ្នាំ២០១៩ នៅទីស្តីការក្រសួងមហាផ្ទៃ ដោយមានការចូលរួមពី អគ្គស្នងការរង ប្រធាននាយកដ្ឋាន ស្នងការរាជធានី ខេត្ត ព្រមទាំងតំណាងស្ថានទូតនៅប្រទេសកម្ពុជាជាច្រើនផងដែរ។
យោងតាមរបាយការណ៍របស់ក្រុមព័ត៌មានទាន់ហេតុការណ៍(HOT LINE) ជាមួយជនបរទេសប្រចាំនៅព្រះរាជាណាចក្រកម្ពុជា នៃអគ្គស្នងការដ្ឋាននគរបាលជាតិ ក្នុងត្រីមាសទី១ ឆ្នាំ២០១៩ បានអោយដឹងថា សភាពការណ៍ពាក់ព័ន្ធជនបរទេស៖ ជនបរទេស ទទួលរងគ្រោះ សរុប ១៦៧ ករណី រងគ្រោះសរុប ២១១នាក់ មាន៣៥ សញ្ជាតិលើ១៥រាជធានី-ខេត្ត។ សញ្ជាតិរងគ្រោះច្រើនជាងគេគឺ ចិន ៩៨នាក់, បារាំង ១២នាក់, អង់គ្លេស ១១នាក់, អាល្លឺម៉ង់ ៩នាក់, អាមេរិក ៧នាក់។ ក្រៅពីជនបរទេសរងគ្រោះ គឺមានជនបរទេសប្រព្រឹត្តបទល្មើសមានចំនួន ៨២ករណី ឃាត់ខ្លួនសរុប ៣៤១នាក់ មាន ២០សញ្ជាតិ លើ១២រាជធានី-ខេត្តទូទាំងប្រទេស លើ២០ប្រភេទបទល្មើស។ សញ្ជាតិប្រព្រឹត្តបទល្មើសច្រើនជាងគេគឺ ចិន ២៤១នាក់, វៀតណាម ៤៩នាក់, ថៃ ២៦នាក់, កូរ៉េខាងត្បូង ៤នាក់, អាមេរិក ៣នាក់។ ក្រុម Hotline ជនបរទេស បានទទួលបណ្តឹងសុំប្រតិបត្តិការអន្តរាគមន៍ពីជនបរទេស និងស្ថានទូតចំនួន ១១ករណី បានដោះស្រាយបញ្ចប់ ៨ករណី និងមិនទាន់បញ្ចប់ ៣ករណី(ស្ថិតក្នុងការស៊ើបអង្កេត)។
ដោយឡែកកិច្ចប្រជុំនេះក៏បានដាក់ទិសដៅសម្រាប់អនុវត្តបន្តដោយបាន បន្តស៊ើបអង្កេតស្រាវជ្រាវ និងដោះស្រាយករណីបណ្ដឹងដែលនៅសល់, បង្កើនការយកចិត្តទុកដាក់ការពារសន្តិសុខ សុវត្ថិភាព និងសណ្តាប់ធ្នាប់សាធារណៈគោលដៅស្ថានទូត និវេសនដ្ឋាន មន្ត្រីការទូត វិនិយោគិនបទេស អ្នកទេសចរណ៍បរទេសប្រកបដោយស្មារតីទទួលខុសត្រូវខ្ពស់, បន្តជួបពិភាក្សាការងារជាមួយគ្រប់ភាគីពាក់ព័ន្ធទាំងអស់ ដើម្បីពង្រឹងកិច្ចសហប្រតិបត្តិការ និងដោះស្រាយបញ្ហានានា៕ មុនីរម្យ
ដោយ៖ នាយកដ្ឋានព័ត៌មានវិទ្យា