នៅព្រឹកថ្ងៃពុធ ៧រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៧ ខែមីនា ឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានដឹកនាំគណៈប្រតិភូជាន់ខ្ពស់ក្រសួងមហាផ្ទៃ អញ្ជេីញទៅទស្សនកិច្ចនៅសាធារណរដ្ឋប្រជាមាណិតចិន តបតាមការអញ្ជើញរបស់ឯកឧត្តម ចាវ ឃើជឺ សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងសន្តិសុខសាធារណៈ នៃសាធារណរដ្ឋប្រជាមានិតចិន។
ក្រៅពីជំនួបពិភ្សាការងារជាមួយថ្នាក់ដឹកនាំក្រសួងសន្តិសុខសាធារណៈ នៃសាធារណរដ្ឋប្រជាមានិតចិន សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នឹងអញ្ជើញជួបពិភ្សាការងារជាមួយសមភាគី ឯកឧត្តម ឆិន វិនឈីង សមាជិកគណៈកម្មាធិការមជ្ឈឹមបក្សកុម្មុយនីស្តចិន និងជារដ្ឋមន្ត្រីក្រសួងសន្តិសុខជាតិ។ ក្នុងដំណើរទស្សនកិច្ចនេះ សម្តេចក្រឡាហោម ស ខេង ក៏គ្រោងចុះហត្ថលេខាលើឯកសារពាក់ព័ន្ធនឹងកិច្ចសហប្រតិបត្តិការលើវិស័យសន្តិសុខ រវាងក្រសួងមហាផ្ទៃ នៃព្រះរាជាណាចក្រកម្ពុជា ជាមួយក្រសួងសន្តិសុខសាធារណៈ និងក្រសួងសន្តិសុខជាតិ នៃសាធារណៈរដ្ឋប្រជាមានិតចិន ដោយផ្តោតលើកិច្ចការសំខាន់ៗមួយចំនួន ដូចជាការប្រយុទ្ធប្រឆាំងឧក្រិដ្ឋកម្មឆ្លងដែន ការជួញដូរមនុស្ស អំពើភេរវកម្ម និងការប្រយុទ្ធប្រឆាំងគ្រឿងញៀន ព្រមទាំងការកសាងសមត្ថ់ភាពកងកម្លាំងអនុវត្តច្បាប់៕ គឹមអាន
ដោយ៖ នាយកដ្ឋានព័ត៌មានវិទ្យា
