ឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ បានមានប្រសាសន៍ជំរុញឲ្យបណ្តាសមាគម អង្គការមិនមែនរដ្ឋាភិបាលបន្តរួមសហការជាមួយរាជរដ្ឋាភិបាលបន្ថែមទៀត ក្នុងការអភិវឌ្ឍសង្គមកម្ពុជាឲ្យកាន់តែរីកចំរើន ជាពិសេសរដ្ឋបាលថ្នាក់ក្រោមជាតិ ក្នុងការអនុវត្តនូវយុទ្ធសាស្រ្តគណនេយ្យភាពសង្គម ដើម្បីពង្រឹងគណនេយ្យភាព របស់រដ្ឋបាលសាធារណៈរដ្ឋបាលថ្នាក់ក្រោមជាតិក្នុងការឆ្លើយតបទៅនឹងតម្រូវការរបស់ប្រជាពលរដ្ឋក្នុងដែនសមត្ថកិច្ចរបស់ខ្លួនប្រកបដោយតម្លាភាព និងប្រសិទ្ធភាព។ ការបញ្ជាក់ដូច្នេះនៅក្នុងពិធីបើកសិក្ខាសាលាទិវាសង្គមស៊ីវិល នាសណ្ឋាគារកាំបូឌីយ៉ាណា នៅព្រឹកថ្ងៃអង្គារ ១៤កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៩ ខែមីនា ឆ្នាំ២០១៩។
ឯកឧត្តម ប៊ុន ហុន បានមានប្រសាសន៍បន្ថែមថា ដើម្បីបន្តពង្រឹងកិច្ចសហប្រតិបត្តិការភាពជាដៃគូរវាងរាជរដ្ឋាភិបាល ក៏ដូចជាក្រសួងស្ថាប័ន រដ្ឋបាលថ្នាក់ក្រោមជាតិ ជាមួយអង្គការសង្គមស៊ីវិល ត្រូវយកចិត្តទុកដាក់ក្នុងការបំពេញកាតព្វកិច្ចតាមការកំណត់ដោយច្បាប់ ព្រមទាំងធ្វើសកម្មភាពឲ្យបានត្រឹមត្រូវស្របតាមបទប្បញ្ញត្តិនៃច្បាប់ស្ដីពីសមាគម និងអង្គការមិនមែនរដ្ឋាភិបាល លិខិតបទដ្ឋានគតិយុត្តពាក់ព័ន្ធនានាជាធរមាន និងលក្ខន្តិកៈរបស់ខ្លួនដែលបានតម្កល់ទុកនៅក្រសួងមហាផ្ទៃ និងប្រកាន់ជំហរអព្យាក្រឹតចំពោះគ្រប់គណបក្សនយោបាយនៅព្រះរាជាណាចក្រកម្ពុជា។ ឯកឧត្តមបន្តថា សមាគម និងអង្គការមិនមែនរដ្ឋាភិបាលទាំងអស់សូមចូលរួមកិច្ចសហការ ព្រមទាំងផ្ដល់ទិន្នន័យសំណុំឯកសារពាក់ព័ន្ធនឹងការតម្កល់ និងការចុះបញ្ជីនៅក្រសួងមហាផ្ទៃទៅក្នុងទម្រង់ទិន្នន័យ (សាលាកប័ត្រព័ត៌មាន)ជាមួយក្រុមការងាររបស់ក្រសួងមហាផ្ទៃ។ ឯកឧត្តមបន្ថែមថា ក្នុងរយៈពេលកន្លងមក អង្គការសង្គមស៊ីវិល បានខិតខំប្រឹងប្រែងចូលរួមក្នុងដំណើរការ ភាពជាដៃគូប្រកបដោយបរិយាប័ន្នក្នុងគោលនយោបាយសកល ថ្នាក់តំបន់ និងថ្នាក់ក្រោមជាតិ ដូចជាគោលការណ៍សកលស្ដីពីគោលដៅអភិវឌ្ឍន៍ប្រកបដោយចីរភាព (SDGs) គោលនយោបាយរបស់អាស៊ាន គោលនយោបាយស្តីពីគោលដៅអភិវឌ្ឍន៍ប្រកបដោយចីរភាពនៅកម្ពុជា (CSDGs) គោលនយោបាយស្ដីពីផែនការយុទ្ធសាស្ត្រអភិវឌ្ឍន៍ជាតិ (NSDP )គោលនយោបាយស្ដីពីកម្មវិធីអនុវត្តដំណាក់កាលទី3 (JP3) គោលនយោបាយស្ដីពីការអនុវត្តក្របខណ្ឌគណនេយ្យភាពសង្គម (JSAF) និងគោលនយោបាយផ្សេងទៀត។
សូមបញ្ជាក់ដែរថា អង្គការសង្គមស៊ីវិលទាំងក្នុងស្រុក និងបរទេសបានដើរតួនាទីយ៉ាងសំខាន់ក្នុងការផ្តល់ និងគាំទ្រដល់សេវាសង្គមនៅតាមមូលដ្ឋានជនបទ និងសហគមន៍ដាច់ស្រយាល និងធ្វើសកម្មភាពនៅគ្រប់រាជធានីខេត្តក្នុងវិស័យសំខាន់សំខាន់ដែលពាក់ព័ន្ធនឹងសេដ្ឋកិច្ច សង្គម នៅក្នុងប្រទេសកម្ពុជា។ អង្គការសង្គមស៊ីវិលក៏បានចូលរួមផងដែរ ក្នុងការតស៊ូមតិអោយមានកំណែរទំរង់ជាតិដើម្បីលើកកម្ពស់សុខភាពការអប់រំ អភិបាលកិច្ច សិទ្ធិមនុស្ស ប្រព័ន្ធច្បាប់ សេវាសង្គម បរិស្ថាន សុខុមាលភាពស្ត្រី និងកុមារ។
គួររំលឹកដែរថា ក្នុងការអនុវត្តច្បាប់ស្តីពីសមាគម និងអង្គការមិនមែនរដ្ឋាភិបាល រហូតមកដល់ពេលបច្ចុប្បន្ននេះ ប្រទេសកម្ពុជាមានសមាគម និងអង្គការមិនមែនរដ្ឋាភិបាលក្នុងស្រុកមានចំនួនសរុប ៥,៣៨៦ (ដែលក្នុងនោះសមាគមចំនួន ២,១៣៥ និងអង្គការមិនមែនរដ្ឋាភិបាលចំនួន ៣,២៥១)។ បន្ទាប់ពីច្បាប់នេះចូលជាធរមានគិតមកដល់ត្រឹមចំណុចខែកុម្ភះឆ្នាំ ២០១៩នេះ មានសមាគម និងអង្គការមិនមែនរដ្ឋាភិបាលក្នុងស្រុកបានសុំចុះបញ្ជីនៅក្នុងក្រសួងមហាផ្ទៃ មានចំនួនសរុប៧៨៨ (សមាគមចំនួន ៣៥៨ និងអង្គការមិនមែនរដ្ឋាភិបាលចំនួន៤៣០)៕ គឹមអាន
ដោយ៖ នាយកដ្ឋានព័ត៌មានវិទ្យា